SAKTONG binukbukay ang gipaabot nga masaksihan sa dihang motapon sa siyudad sa Bogo ang ALA on Tour:Bakbakan sa Bogo karong Disyembre 14 nga ipahigayon sa Don Celestino Martinez Sr. Sports Complex.
Ning higayona, ang knockout artist sa Ala Boxing Gym nga si Jeo “Santino” Santisima, kanhi WBO Oriental Champion, mosuway sa katakos sa beterano ug internationalist nga si Rene Dacquel sa Malate, Metro Manila sa main event fight.
Si Santisima, lumad nga taga Aroroy, Masbate, adunay 18-2 nga baraha, diin 15 sa iyang mga daog pulos iyang gipang-knockout.
Sa uwahi niyang away niadtong Agusto 17, 2019 sa Superdome sa Ormoc City, iyang gipakamang ang batan-on nga Indonesian nga si Alvius Maufani sulod lang sa usa ka round.
Batok ni Dacquel, gituohan nga malisod nga kombati ang iyang sagubangon sanglit ang 28 anyos nga taga Malate, Metro Manila adunay saktong eksperiyensa ilabi na sa pagpanulong sa ubang nasod.
Sa Dacquel, 28-anyos, mosaka ibabaw sa ring nga may 20-9, 6KOs nga baraha.
Hinuon sa uwahi niyang tulo ka mga away, pulos kini nakaangkon og kapildihan.
Niadtong Disyembre 22, 2018 napakyas siya sa paglangkat sa bakanting Philippine Games and Amusement Board bantamweight title pinaagi sa RTD sa ikalimang round.
Pakyas usab siya sa iyang pagsuway og langkat sa WBC International Super fly human kini mapildi sa South African nga si Yanga Sigqibo sa split decisison didto sa East London niadtong Hulyo 27, 2018.
Nakaaway usab siya sa Australia batok ni Andrew Moloney alang sa WBA Oceana Superfly title apan napildi sa unanimous decision niadtong Pebrero 24.
Masilbing supporting bouts sa maong card mao ang panagsangka sa Fil-Japanese nga si Go Hosaka sa San Fernando, La Union nga makigsinukliay sa kumo batok ni Boyce Sultan, sa Zamboanga del Norte alang sa eight-round fight.
Magtakos usab sila si Regie Suganob sa Bohol ug si Rolly Dorong sa Mandaue City; Pete Apolinar sa Omega Gym batok Lloyd Jardeliza sa Roxas, Mindoro Oriental.
Magsinukliay usab sa ilang kumo sila si Carlo Bacaro sa Omega Boxing Gym ug Kelvin Tenorio sa Batangas sa 6-round bout. (JBM)