5:15 pm. - UV vs. Ateneo (high school)
6:45 pm. - UV srs. vs. UC (college)
Posibling moduwa ang University of Cebu (UC) Webmasters sa semifinals Huwebes, Nobiyembre 14, nga wala ang ilang import batok sa defending champion University of the Visayas (UV) Green Lancers sa Cebu Schools Athletic Foundation, Inc. (Cesafi) men’s basketball sa Cebu Coliseum.
Kini tungod kay ang reinforcement niini nga si Tosh Sesay hayan masuspenso tungod kay wala kini moapil sa Cesafi All Star Game slam dunk competition niadtong Dominggo.
Hangtod ning pagsulat pabilin nga wala pa masayod ang kampo sa UC kon unsa desisyon ni commissioner Felix Tiukinhuy human nila gisumiter ang medical certificate nga nagpamatuod nga ang injury sa kumagko niini maoy hinungdan nga wala moapil ang ilang import.
Gibutyag ni Sesay nga daan na siyang nananghid ni commissioner Tiukinhuy nga dili siya makaapil sa slam dunk tungod sa maong injury. Gitugotan man tuod siya sa commissioner apan ubos sa kondisyon nga kinahanglan makasumiter kini og dokumento o medical certificate nga magpatuod nga kini na-injured gyud.
Ang maong mga papeles gisumiter kagahapon, Miyerkules, ngadto sa commissioner’s office. Apan hangtod ning pagsulat wala pay desisyon nga nadawat ang UC.
Ang lagda kalabot sa All-Star game nagkanayon nga kadtong mga student-athletes o coach nga nangapili nga mosalmotg sa All Star game apan napakyas og dili moduwa sa way igong rason pahamtangan og silot nga pagkasuspenso sa nahabiling duwa sa season.
Si Jonas Panerio sa SunStar Cebu misuway og text ni Tiukinhoy aron pagkuha kon unsay desisyon niini, apan wa kini tubaga hangtod ning pagsuwa.
Hinuon si Rocky Alcoseba, ang anak ug assistant coach ni Yayoy Alcoseba sa UC, malaumon nga makaduwa ra gihapon si Sesay.
“We are confident he will be allowed to play since we have valid reasons and we have legitimate supporting documents,” matod ni Alcoseba.
Ang UC nga maoy no. 2 human sa elimination round maoy nakakuha sa twice-to-beat advantage batok sa no. 3 nga Lancers.
Si Shane Menina, pointguard sa UC nagkanayon nga ilang giandam ang ilang kaugalingon may import man sila o wala.
Si UV coach Garry Cortes, sa iyang bahin, nga anaa man tuod sila sa alanganin nga habig apan pabilin nga taas ang moral.
Sa high school division, mosuway pagtuktok sa finals ang UV Baby Lancers batok sa Sacred Heart School-Ateneo de Cebu sa preliminary game sa alas 5:20 sa hapon. (JNP, JBM)