SUPERBALITA CEBU

Dakbayan sa Sugbo migamit og Gers

GISUBHAN sa Dakbayan sa Sugbo ang Command Control Center (C3) niini pinaagi sa pag-gamit og mobile application nga direktang makapanangpit ang mga lungsuranon ug lumalabay kung may emerhensiya nga nanginahanglan og diha-diha nga pagtubag.

Kini human gipirmahan ni Mayor Edgardo C. Labella sa miaging Miyerkoles ang usa ka kasabutan uban sa SugboTek, Inc. nga gamiton sa C3 ang Guardian Emergency Response System (Gers) sa buhatan niini sa Mambaling.

Unang na-uyonan sa konseho sa sisyon niini pagka-Okt. 15 ang MOA, dala na ang pagtugot sa mayor nga pirmahan kini sa iyang opisina pagka-Okt. 30 uban kang Cloyd B. Dedicatoria, CEO sa SugboTek, Inc., ang mimugna sa Guardian.

Human sa pagpanaud sa mga ekipo ug pagbansaybansay sa mga gikinahanglang kawani, magamit na unya sa publiko nga libre ang Guardian nga 24/7 aron makapanawagan kung may sunog, kakulian sa panglawas, krimen ug ubang mga kakulian, ilabina kung may katalagman.

Anaa na daan ang Guardian sud na sa duha ka tuig sa dihang gi-pilot pa kini sa upat ka mga barangay sa dakbayan - Apas ug Santo Niño sa amihanang distrito, ug Poblacion Pardo ug Tisa sa habagatang bahin.

Sa paglagda sa MOA, gawas sa pagtaud sa sistema sa C3, dasigon unya sa dakbayan ang ubang mga barangay, ilabi na sa mga densely populated areas, harun mogamit sab sa Guardian ug sa paggahin alang niini.

Konsepto sa Guardian nga mapatuman ang mga panawagan kung may emerhensiya ngadto sa mga barangay kansang mga operator mas nakahibalo sa mga pasikotsikot sa ilang dapit ug mas sayon nga maduma ang mga responders, mipasabot si Dedicatoria

Libre nga ma-download pinaagi sa internet, matugotan sa Guardian ang publiko nga mogamit sa ilang mobile phones kung magpakitabang o’ motaho og panghitabo,“pinaagi lang sa usa ka pindot sa telepono,” siya midugang.

I-alerto sa app ang C3 o’ ang pinakaduol nga barangay nga may kahimanan sa Guardian kansang operator mao na ang manawag sa mi-alerto alang sa dugang nga mga detalye, samtang magpadala kini og mga motubag gamit ang laing software.

Gawas sa mga ekipo ug tigresponde sa C3 o’ sa mga barangay, ug sa mga may mandato nga mga ahensya sa kagamhanan, mamahimo sa’ng ma alerto sa Guardian ang mga boluntaryo, sama sa mga doktor, nars ug tanod, siya miingon.

Kung andam na, dasigon unya sa lokal nga kagamhanan ang mga tagilungsod ug kasagarang lumalabay sa dakbayan nga mo-download gikan sa Google Play ang app nga “Guardian Emergency Response” ug mo-sign up harun maka-access kung may emerhensiya gamit ang pribadong Wi-Fi o’ mobile data.

Magamit sab sa katawhan ang Pipol Konek, usa ka public Wi-Fi system nga gipakatap na sa Department of Information and Communication Technology (DICT), bisan kung anaa pa lang sa mga publikong tulunghaan ug pipila ka mga public areas, sama sa Plaza Independencia.

May offline mode sab ang Guardian, nga makahibalo gihapon ang C3 sa lokasyon sa nanawag ug ang kakuliang kinahanglang matagad, mibutyag si Dedicatoria.

Gigamit na sukad Disyembre ang Guardian sa dakbayan sa Mandaue, nga karon anaa pa sa Bantay Mandaue 161 command center, ug sa dili madugay sa pipila ka mga barangay clusters sugod una sa Subangdaku human mimando alang niini si Mayor Jonas C. Cortes, siya midugang.

Gisugdan sa SugboTek ang pagmugna sa usa ka friend finder app hangtud 2013 sa dihang nakamugnag dagkong mga kadaut ang Super Typhoon Yolanda didto sa Leyte ug amihanang Sugbo, ug ang dakong linog sa Bohol nga mitay-og sa Sugbo.

Naka-aghat ang maong mga katalagman kang Dedicatoria, nga may mga paryente sa Tacloban, nga usbon kini sa nahimo karong Guardian app.

Sama sa mga dabkayan sa Sugbo ug Mandaue, gipaninguha na sab karon sa SugboTek ang ubang mga LGUs nga sagopon ug ipakatap ang Guardian, lakip na sa Talisay Cty ug ingon man sa mga dakbayan sa Caloocan ug Malabon sa Metro Manila, Davao City, ug lungsod sa President Roxas sa Zamboanga del Norte. (Tampo)


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph