ANG Cebu City Government di na moabang og mga garbage truck nga maoy mokolekta sa mga basura gikan sa mga balay paingon sa transfer station sugod sa 2020.
Apan, tun-an pa sa Siyudad kon moabang pa ba sila og mga truck aron mohatod sa mga basura gikan sa transfer station ngadto sa landfill.
Kini human niabot ang 21 ka bag-ong garbage compactor trucks nga gipalit sa administrasyon ni kanhi mayor Tomas Osmeña.
Ang Siyudad migasto og P200 milyunes sa pagpalit sa tanang compactor trucks.
Si Mayor Edgardo Labella niingon nga susihon pa hinuon nila pag-ayo kon angay ba o di nga moabang og mga dumptruck ang Siyudad nga maoy mohakot gikan sa transfer station paingon sa landfill.
Ang mayor nipadayag nga makadaginot ang City Government og di mominos P25 milyones matag unom ka buwan kon di na sila mo-outsource og mga ekipo.
Ang Siyudad dunay kontrata nga gipirmahan tali sa Jomara Konstruckt alang sa Hulyo paingon sa Disyembre karong tuiga sa paghakot sa mga basura gikan sa balay ngadto sa transfer station ug dayon ngadto sa landfill.