NAKAUBAN ko sa grupo sa mga batan-on, presidente sa Davao Mission of Seventh-day Adventist Church Pastor Edwin Magdadaro, mga pangulo ug miyembro sa distrito sa Tugbok, Calinan ug Marilog sa Davao City sa ilang paghatud sa mga hinabang sa mga biktma sa linog didto sa Barangay Bacungan, Magsaysay, Davao del Sur niadtong milabay nga Dominggo.
Akong nakita sa personal ang kahimtang sa mga apektado sa pagtay-og nga mipahapla sa ilang mga kabalayan ug nagbilin og dakong kadaot sa munisipyo ug uban pang mga gambalay sa maong lungsod.
Sa una, makakita ta og mga barong-barong kilid sa mga balay diin nagadula ang mga bata apan karong panahona halos tanang kabalayan dunay gitukod nga mga tent kilid sa balay kay didto na sila mangatulog tungod talandugon na ang kahimtang sa ilang balay.
Usa ka kusog nga pagtay-og pa ang mahitabo, posible nga matiwas na pagkahugmak ang nabilin nga mga balay.
Ang mingaw nga lungsod sa Magsaysay tungod tuyuon ug sudlonon, karon nahimong bibo kay magbahis-bahis lang ang mga sakyanan nga nagdala og mga hinabang alang sa mga molupyo nga naapektuhan. Dagko ug gagmay nga mga sakyanan apil pa ang mga riders nagdala sa ilang mga hinabang.
Sa mga evacuation centers dunay nagabagulbol nga kuno wa sila mahatagan og hinabang nga mga relief goods gikan sa gobyerno kay wa naapil ang ilang pangalan sa listahan.
Ngano kaha nga nalinogan man pud sila apan walay labot sa hinatagay?
Dili kaha tungod sa politika apil ang pagpanghatag og hinabang panahon sa kalamidad gisakyan sa mga politiko nga kon sa ilang pagtuo wa miboto kanila panahon sa eleksyon dili prayoridad nga matabangan?
Sa laing bahin daghan ang nakaingon nga kastigo sa Ginoo ang nahitabo nga trahedya tungod kay hugaw na ang kalibutan tungod sa sala sa katawhan. Ang probinsya sa North Cotabato usa sa labing apektado sa hulaw niadtong milabay nga mga bulan. Human sa hulaw, misunod ang linog.
Ug samtang ang katawhan sa dapit sa lungsod sa Makilala nagpuyo sa ilang mga tent, gikuso-kuso nasab sa hail storm diin ang ulan murag diyolin ang gidak-on.
Nakadungog ko sa una nga dunay ulan nga murag tipasi sa mais ang gidak-on apan lahi ang mibunok sa mga nagtapok nga bakwit sa Makilala karong semanaha lang. Gikastigo ba gyod sila sa Ginoo kay wa namay undang ang kalamidad nga ilang nasinati?
Sa basahon ni San Juan sa 1John 4:8 ang Biblia nag-ingon nga Ang Diyos gugma, apan asa man ang gugma sa Diyos sa nahitabo ining mga tawhana? Naglisud ang katawhan kay naundang ang ilang panginabuhi human sa linog, hugmak ang ilang mga balay, Daghan ang nagpangutana, “Asa man ang Diyos nianang panahona pag linog?”
Duna pod nagsulti nga gilinog sa Ginoo tungod nahigugma siya sa katawhan ug gusto niyang pukawon ug pahinomduman nga angay siyang alagaron ug simbahon sa katawhan tungod daw nakalimot na ang kadaghanan kaniya. Maingon nato nga usa lang kini ka pagsulay sa katawhan.
Sa sugilanon sa Biblia mahitungod sa kinabuhi ni Job dili ang Diyos ang mipahamtang sa kasakit kang Job apan gikan sa Yawa ug gihatagan sa pagtugot sa Ginoo nga sakiton si Job.
Sa akong yano nga pagsabot lahi ang kastigo nga ipahamtang sa Ginoo sa mga dili mosimba kaniya kay mapatag ang mga bukid sa kakusog sa pagtay-og ug 50 ka kilos ang kabug-aton sa mga yelo nga moulan gikan sa langit apan ang katawhan dili gihapon mamatay bisan ang katawhan na ang mangita sa kamatayon kay ipabati sa Ginoo ang iyang kabangis.
Apan sa dili pa kini moabot nagpahimangno siya sa katawhan nga mogula gikan sa Babilonya ug dili mosimba sa mananap nga mapintas aron dili maapil sa iyang kapungot. Basin sa sunod nga mga panahon atong mahisgutan ug matun-an kalabot sa mananap nga mapintas aron makalikay ta sa hampak sa Ginoo.
Buot kaba mahibalo niining mga hampak ug magdugang pagtuon sa Biblia? Dunay katawhan nga andam motabang ug magpasabot kanimo uban sa tabang sa balaan nga espiritu.
Text lang sa 0947-814-3026.