MAMASAPANO, Maguindanao Province -- Nangamatay ang mga binuhing kahayopan human magka-engkuwentro ang militar ug mga sakop sa Bangsamoro Islamic Freedom Fighters (BIFF) niadtong niaging adlaw.
Sa taho sa kapulisan sa Mamasapano Municipal Police Station, nasayran nga niabot sa 20 ka baka ug tulo ka kanding ang nangamatay human maipit sa engkuwentro sa 33rd Infantry Battalion (33rd IB), Philippine Army ug BIFF.
Niulbo ang giyera sa diha nga gipabuthan sa grupo ni Shiekh Esmail Abdulmalik, alyas Kumander Abu Toraife sa BIFF, ang nagpatrolya nga mga sundalo sa Barangay Tukanalipao, Mamasapano nga nilungtad og usa ka adlaw.
Nangatras ang mga rebelde sa diha nga gikanyon sa mga sundalo, uban sa pagpamomba sa duha ka MG-520 attack helicopters.
Nasayran nga pito ang namatay sa bahin sa BIFF samtang 11 ang naangol.
Sa bahin sa militar, usa ang namatay nga sakop sa 33rd IB samtang duha sab ang samaron.
Hangyo karon sa mga tag-iya sa mga nangamatay nga baka ug kanding nga unta tabangan sila sa gobyerno, ubos sa Bangsamoro Autonomous Region in Muslim Mindanao. (Edgar E. Fuerzas)