‘Wakwak’ miatake

MAGSAYSAY, Davao del Sur -- Gikagubtan sa mga biktima sa linog sa lungsod ang nikatap nga mga istorya bahin sa giingong lalaki nga giatake og wakwak samtang natulog sa purok gawas sa ilang balay.

Matud ni alyas Ditmer, 19, nga nakurat na lang siya sa iyang pagmata human nahiagom na siya og mga kinawrasan sa bukton.

Dugang sab sa usa ka alyas Jayvie nga nakakita sab siya og usa ka dakong langgam nga kolor itom, pula ang mata kon diin dunay usa ka dupa nga gilapdon sa pako niadtong Dominggo sa gabii, Nobyembre 10.

Giingong nag-trending sab sa social media ang post sa mga netizen kalabot sa wakwak.

Matud ni Joy, molupyo sa Barangay Poblacion, nga usa ka babaye ang wakwak nga giingong bag-o lang natakdan ug mahimo niyang ikambyo ang iyang panagway sa usa ka iring o iro.

Sagad sa mga biktima sa linog ang natulog gawas sa ilang balay diin nagtaod og trapal.

Apan, daghan ang nabalaka sa pagkabaniog sa balita kalabot sa wakwak.

Hinuon, nagpahimangno ang kapulisan sa Magsaysay Municipal Police Station nga di mokompiyansa kay tingali og modus kini sa mga kawatan aron nga makapahimulos sa kahigayonan ug makasulod sa balay.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph