GIBULGAR ni Lapu-Lapu City Mayor Junard Chan ang mga binuhatan ni Association of Barangay Councils (ABC) president Eduardo Cuizon atubangan sa mga mitambong sa ABC Night niadtong Martes sa gabii, Nobiyembre 12, nga gipahigayon sa city auditorium.
Apan gihulagway sa ABC president nga “bubot” ang gipangsulti ni Chan. Sa 30 ka barangays sa dakbayan, adunay 23 ka barangay representantive ang misaksi ug 12 niini mga kapitan ningtunga bisan sa kakuwang sa pagpangandam sa kalihokan.
Ang mayor mipahungaw sa iyang kahi-ubos ngadto sa audience batok ni Cuizon, kapitan sa Barangay Bankal, nga taliwala sa iyang tinguha nga magkahi-usa tali sa opisyon, pabilin kining nagmagahi.
Matod ni Chan nga kon adunay mga resolution o endorsement nga ipalabang sa konseho alang sa kalambuan ug kaayuhan sa Dakbayan, numero unong mobabag ang liga president isip ex-officio member sa city council.
“Dies porsento ray tinuod sa gisulti ni Ahong. Pulos ra gyud to binutbot,” reaction ni Cuizon sa dihang nahinabi sa Superbalita Cebu. Iyang gipanghimakak nga kanunay nalang siyang mobabag. (FVQ)