WALO ka mga tawo ang nadakpan kagabii, Nobyembre 13, 2019, hangtud na sa kadlawon sa Huwebes, Nobyembre 14, sa managlahi nga pagpangronda sa dakbayan sa Sugbo.
Tulo ang nadakpan sa Barangay Sawang Calero diin ang target notado nga namaligya ug drugas kanang pangalan niini miabot na sa rehiyonal nga buhatan sa kapulisan.
Si Maricel Reyes, 35 anyos og residente sa Block 4, Barangay Sawang Calero, maoy subject sa anti- drug operation nga gipahigayon sa mga sakop sa San Nicolas Police Station.
Kauban nga nasikop ni Reyes kay sila Pepe Quimada ug Reynante Tacatani, puros 35 anyos og lumulopyo sad sa maong lugar.
Nakuha gikan ni Reyes ang moabot sa kapin P300,000 nga gidudahang shabu.
Sigon sa kapulisan nga hagbay nang gipangita si Reyes human gireport ang pangalan niini sa buhatan ni kanhi Police Regional Office-Central Visayas director P/Brigadier Gen. Debold Sinas.
Si Sinas mimando kaniadto nga sutaon kung unsa ka balido ang gipaabot nga kasayuran Samtang, nasikop sa nga sakop sa Provincial Intelligence Branch (PIB) ang usa ka landlord, iyang ig-agaw nga babae ug duha niya ka boarder sa dihang naaktohan kini namaligya og shabu sulod sa usa ka boarding house sa Sitio Baod, Barangay San Nicolas niadtong Miyerkules sa gabii, Nobyembre 13.
Nasikop sila Jumer Andales Alegado, 27 anyos, nga maoy subject sa buy-bust; John Kristoffer Villanueva Ortega, 18 anyos; Jenny Estan Mansueto, 42 anyos; ug Domingo Montero Arellano, 55 anyos.
Ang maong buy bust operation sa gipangulohan ni PLt.Col. Marlu Conag, ang labaw sa PIB.
Nasakmit sa maong pag pangdakop ang moabot na P100,000 nga balor sa shabu.
Samtang, nasikop sa mga sakop sa Abellana Police Station ang usa ka pintor atol sa gipahigayon nga buy-bust operation sa Sitio Santa Cruz, Barangay Barrio Luz, dakbayan sa Sugbo.
Nasikop si Emilio Abendan, 22 anyos, og nakuhaan kini og kapin sa P200,000 nga balor sa shabu.
Moabot usab sa kapin P600,000 ang balor sa shabu nga nasakmit sa manag lahi nga pag pangronda.(Superbalita Cebu)