WALAY suspensiyon ug gitugotan ni Commissioner Felix Tiukinhuy Jr. nga makaduwa ang import sa University of Cebu (UC) nga si Tosh Sesay sa dihang ilang ikasangka ang defending champion University of the Visayas (UV) Green Lancers sa Cebu Schools Athletic Foundation, Inc. (Cesafi) college division karong gabii (sa Pilipinas) Huwebes, Nobiyembre 14 sa Cebu Coliseum.
Kini maoy desisyon ni Tiukinhuy human sa makuti nga pagsusi sa mga dokumento nga gisumiter ni Sesay nga nagpamatuod nga nakaangkon siya og injury sa niaging semana hinungdan nga wa siya makasalmot sa slam dunk competition sa All Star Game niadtong Dominggo, Nobiyembre 10.
Ang athletic diretor sa UC nga si Jessica Honoridez mibutyag sa SunStar Cebu sa maong kalambuan.
Iyang gisaysay nga gani ang doktor misugyot nga angayan papahuwayon si Sesay og tulo ngadto sa lima ka adlaw.
Hinuon, ang desisyon anaa ra sa team management sa unibersidad.
Sigon sa konsultasyon sa coaching staff sa UC, ilang nadesisyonan nga paduwaon si Sesay karong gabii sa semis diin ang Webmasters maoy naghupot sa twice-to-beat nga bintaha batok sa Lancers.(JBM/JNP)