14 misugal sa kaka, napriso
SIMPLENG kalingawan lang unta nga sugal sa kaka alang kanila apan, wa nila damha nga mao kini ang hinungdan nga sila mabalhog sa prisohan niadtong Miyerkules sa gabii, Nobiyembre 13, 2019.
Wa unta masayod ang mga pulis sa ilegal nga sugal apan, ang mga lumolupyo sa Barangay Hipodromo, Dakbayan sa Sugbo, nga gisabaan sa ilang mga singgit maoy ningtaho sa Mabolo Police Station sa Cebu City Police Office (CCPO).
Katorse ka mga hamtong nga mga lalake nga managsilingan ra usab dungan nga napaslak sa detention cell sa Mabolo Police Station human maaktuhing nagsugal sa sabong sa kaka.
Si Police Staff Sergeant Gerby Maloloy-on wa batia og kaluoy samtang nag-imbestigar sa mga dinakpan sa iyang mga kauban kay angay ra sab kining sikupon tungod sa ilegal nga sugal.
Giila ni Maloloy-on ang mga suspek nga sila si Rommel Re, 32; Erwin Ugsang, alyas Tikoy 36; Ivan Lyndon Uy, 25; Mark Raymond Villamor, alyas Emon, 22; Hidie Pagquil Navarro, 29; Antonio Patalinghug Jr.,alyas Tonyo, 29 ; ug William Hewal, alyas Bordis, 53; Jade Pancho, alyas BB, 32; Ricardo Castro, alyas Cardo, 52; Luciano Isidro, alyas Inting 52; Julieto Ebo, 27; Ronald Burgador, alyas Nanding, 25; Crispin Espina, alyas Epin 40; ug Ragne Regner, 44. Ang 14 pulos mga lumolupyo sa Sitio San Roque, Barangay Hipodromo.
Matod ni Maloloy-on nga pipila na ka mga higayon nga gipaabot ang mga sumbong sa ilang buhatan tungod sa kabanha halos matag gabii kay magpustaanay sa sabong sa kaka. Miyerkules sa alas 10 sa gabii wa matiwas ang katapusang sultada sa kaka kay nangabot ang kapulisan.
Way bisan usa nga nakadagan sa nagtapok nga nag-apong sa gamay nga stage arena. Ang ilang kalangas gipulihan sa kamingaw sa pag-abot sa kapulisan. Lakip nga nasakmit ang gamay nga kahon diin gipakatulog ang 10 ka mga kaka, apil ang usa ka tukog sa silhig gidala og apil isip ebidensiya.
Lakip sa nadala ang stage spider arena ug kwarta nga P300 nga maoy pinusta. Si Castro, usa sa mga dinakpan, niingon nga bag-ohay pa siya, niabot kay nitan-aw pa siya sa iyang paboritong salida.Nananghid siya sa iyang asawa nga molakaw kay motan-aw sa away sa kaka.
“Sus, kon naminaw pa lang ko sa akong asawa, di jud ko maapil ani,” matod ni Castro sa Superbalita Cebu.
Samtang si Police Major Dindo Juanito Alaras, hepe sa Mabolo Police Precinct, dihang nahinabi sa Superbalita Cebu niingong nga sa Huwebes sa hapon napasakaan na og kasong kalapasan sa Presidential Decree 1602 kun anti-illegal gambling.
Sa pagsuwat ning taho, ang 14 natanggong pa sa Mabolo Police Station kay wa pa moabot ang papel alang sa pagtugot sa pagpiyansa kanila. Ang pyansa naggagikan sa P3,000 ngadto sa P8,000 matag usa.