ARON paghatag og solusyon sa mga yangungo sa Talisaynon ug sa mga silingan nga lungsod kalabot sa problema sa transportasyon, nipadayag si Talisay City Mayor Gerald Anthony "Samsam" Gullas Jr. sa iyang kaandam sa pagdawat sa proposal sa modernized jeepneys o Beep nga mamasahero sa mga major nga dalan sa dakbayan.
Niadtong Martes, Nobyembre 12, 2019, nakadawat ang buhatan ni Gullas og suwat gikan sa Persano Corporation nga maoy operator sa mga Beeps nga nagdagan karon sa mga dalan sa dakbayan sa Sugbo.
Ang Beep ang usa na sa mga modernized Public Utility Vehicle (PUV), diin 54 ka mga units niini ang nagdagan sa pipila ka dalan sa dakbayan sa Sugbo.
Pinaagi sa ilang operations manager, Warren Flores, tanyag niini ang mamasahero diha gikan sa Barangay Linao padulong sa SM City Cebu, agi sa Cebu South Coastal Road (CSCR), ug laing rota diha sa Barangay Lawaan padung sa SM City Cebu, agi sad sa N. Bacalso Avenue.
Sa gi-post sa mayor sa iyang Facebook page, nakaangkon kini og mga panawagan dili lang mga Talisaynon, apan lakip na gikan sa lungsod sa Minglanilla, hangtud na sa dakbayan sa Naga, nga dawaton ang tanyag sa Persano.
Ilabi na nga sa pagkakaron, menos pa kaayo ang pampublikong sakyanan nga nagdagan sa may CSCR.
Susama usab niini ang yangungu sa mga pasahero nga diha tig-agian sad sa N. Bacalso Avenue.
“Willing nami. Akong giingnan si Joy (Tumulak, ang traffic czar sa dakbayan sa Talisay) nga ato kining pakigkitaan (ang Persano Corporation) para we can look ways on how to move forward regarding this. Kay nakita man sad nako nga niuyon man sad ang Talisaynon nga naay beep nga mo-traverse sa Talisay nga rota,” asoy ni Gullas.(Superbalita Cebu)