SUPERBALITA CEBU

Harden milupig ni Leonard: NBA

GITABANGAN. Si James Harden sa Houston Rockets nga gitabangan og depensa sa Los Angeles Clippers niining aktoha atol sa ilang duwa sa National Basketball Associatioon (NBA), Huwebes, Nobiyembre 14. (Hulagway gikan sa Associated Press)

NAGBANGIS si James Harden sa fourth quarter aron itugpo ang Houston Rockets ngadto sa pungasi nga kadaugan batok sa Los Angeles Clippers, 102-93, sa National Basketball Association (NBA) Western Conference, Huwebes, Nobiyembre 14.

Ang kanhi most valuable player, sa kinatibuk-an, mipakatap og 47 puntos, pito niini gikan sa three-point area, nga gidayandayanan usab og unom ka rebounds ug pito ka assists.

Sa fourth quarter lang, siya mipabuhagay og 17 puntos ug maoy nagpapas sa labaw sa Clippers, 84-80, sa katapusang 5:52 sa duwa paingon ngadto sa kadaugan.

Giabaga ni Harden ang opensa sa Rockets, uban sa suporta nila ni Russel Westbrook (17 puntos) ug Clint Capela (12 puntos) kinsa mao ra usab ang naka double-figures sa Houston.

Ang Clippers, sa ilang bahin, gipangulohan ni Kawhi Leonard, nga may 26 puntos, 12 ka rebounds ug pito ka assists.

Lou Williams mihagdaw usab og 20 puntos, ug 14 gikan kang JaMychal Green alang sa Clippers kansang baraha nahagsa sa 7-3. S Ang Rockets misaka sa 8-3.

Sa Eastern Conference, ang Boston Celtics mipalig-on sa ilang paghupot sa liderato, 9-1, human nila dominaha ang Washington Wizards, 140-133.

Si Kimba Walker mitali og 25 puntos sa iyang impresibong performance sa Celtics diin pito ka mga players ang naka double digits.

Si Jayson Tatum mipaksit og 23 puntos ug 22 sab ang natampo ni Jaylen Brown. Ang Turkish nga si Enes Kanter milangkat og siyam ka rebounds gawas sa iyang 13 ka rebounds.

Ang kapildihan sa Wizards maoy nagbaliwala sa 44 puntos ni Bradley Beal kinsa aduna usay lima ka rebounds ug unom ka assists.

Gipakaging usab sa Orlando Magic ang Philadelphia Sixers, 112-97. Ang Sixers miduwa nga wala ang ilang sinaligan nga si Joel Embiid, nahagsa sa 7-4 samtang ang Orlando misaka sa 4-7 nga baraha.

Sa ubang duwa, gilumsan sa Los Angeles Lakers ang mga Warriors, 120-94; gikitkit sa Minnesota Timberwolves ang San Antonio Spurs, 119-114.

Gipatapsingan sa Memphies Grizzlies ang Charlotee Hornets, 119-117. (JBM)


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph