SUPERBALITA CEBU

P8.8 milyon nga marijuana nasakmit; kanhi kagawad, 2 ka kauban nasikop

(Contributed foto)

USA ka kanhi konsehal sa barangay, iyang anak ug pag-umangkon ang gipangdakop sa kapulisan ug operatiba sa Philippine Drug Enforcement Agency (PDEA) human kini nasakpan nga namutol sa mga punoan sa marijuana sa Sitio Capyoan, Barangay Sunog, bukirang bahin sa lungsod sa Balamban ganihang sayo sa buntag, Nobyembre 14, 2019.

Ang mga nadakpan mao silang Leopoldo Bonghanoy, 64 anyos, kanhi konsehal sa maong barangay; Arnel Castro, 37 anyos; ug Fernan Bonghanoy, nga pulos nagpuyo sa maong dapit.

Nakuha sa mga operatiba ang kapin sa 22,000 ka punoan sa marijuana nga mobalor ang tanan sa 8.8 milyones ka pesos.

Matod ni P/Major Christian Torres, ang hepe sa Balamban Police Station nga sa ilang pag-abot sa dapit, ilang naabtan ang tulo nga nagdali-dali pag pamutol sa mga punoan sa marijuana aron unta tagoan.

Mihimakak pa kini nga dili sila ang nananum niini apan adunay ebedensya ang kapulisan nga sila tungod kay adunay hose nga maoy gamiton sa pag bisbis sa mga tanom nga marijuana gikan sa balay ni Bonghanoy.

Dali usab nga misaka si Balamban Mayor Alex Binghay ug nakurat sa iyang nakita nga ang gidakop nga si Leopoldo, nga giingong iyang kompare sa kasal.

Apan bisan pa man niini wala mopasaylo ang mayor ug iya gyud kining gipadakop uban sa anak niini ug pag-umangkon.

Gisunog ra usab dayon sa mga operatiba ang nakuhang mga punoan sa marijuana didto sa dapit diin ilang gipang-ibot.

Gawas sa mga sakop sa Balamban Police Station ug PDEA 7, mga sakop sa Provincial Mobile Force Company nikuyog sad sa maong pagpangronda. (Superbalita Cebu)


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph