NAIG-AN na sab ni Katrina Halili ang kampo ni Hayden Kho, Jr. kini human nga giuyunan sa Department of Justice (DOJ) ang pagpasang-at og kasong libelo batok kang Mrs. Irene Kho nga inahan ni Hayden.

Duha ka ihap sa kasong libel ang gipasang-at ni Katrina batok Mrs. Kho.

Kung kahinumduman nga last year, dihang init pa ang hisgutanan sa sex video scandal nila ni Katrina ug Hayden, namahayag sa TV Patrol World si Mrs. Kho.

Sa maong interview, gibutyag ni Irene nga naga-drugs si Katrina ug kini ang nagapugos kang Hayden aron nga mag-druga.

Lakip sa gilambigit sa droga ni Mrs. Kho si Omar Sortijas nga handler ni Katrina. Si Omar daw ang nagadala og druga nga ginagamit ni Katrina.

Mipasang-at na sab og kasong libel si Omar kang Mrs. Kho ug naa na sab kini sa korte.

Sumala sa resolution gikan sa DOJ nga gipirmahan ni Secretary Agnes VST Devanadera may igong kapasikaran ang kaso.

Gihuwat na lang karon ni Katrina kung kanus-a i-raffle ang kaso batok kang Mrs. Kho nga naa sa Quezon City-RTC.

Tungod kay nasang-at na ang kaso, kinahanglan na nga mopiyansa ni Mrs. Kho tungod kay isyuhan na kini og warrant of arrest.

Dako ang kalipay karon ni Katrina tungod kay nakita niyang midagan gayud ang ligid sa hustisya gikan sa grabeng pagkadaot sa iyang pangalan last year.