Sugilanon: Mga bakho sa Nobiyembre

UGMA mao na ang unang adlaw sa Nobiyembre ug moadto si Fely sa sementeryo sa Carreta kay mao man kiniy gikasabutan nilang Tomas, ang lalakeng buot moangkon pag-usab sa iyang kasingkasing. Buotan si Tomas nga taga dinhi usab sa ilang balangay sa Pulang Rosas. Si Tomas hinigugma niya kaniadto sa nagpanuigon pa siyag desisayis. Si Tomas maoy iyang unang gugma. Kaniadto, matag hapon dad-on siya ni Tomas ngadto sa taluktok sa bungtod ibabaw sa ilang balangay ug adto didto maabtan silag kahapunon ug ilang masaksihan ang pagtunod sa Adlaw sa luyo sa dakong bukid.

Apan nahilayo si Fely kang Tomas dihang gipa-eskuyla siya sa iyang iyaan nga adunahan didto sa siyudad. Ang iyang iyaan maoy migasto sa iyang pagtungha. Didto sa siyudad gikaila niya si Pancho, usa ka batan-ong pulis, nga mipadayag sa iyang gugma kang Fely. Gisugot niya si Pancho kay nakita niya ang katiunay sa pagbati niini nganha kaniya. Gikasal sila ug nagluon sa salag sa kaminyuon. Pinangga siya ni Pancho ug sa ngadto-ngadto mipitik sab ang iyang kasingkasing ngadto niini isip iyang bana.

Usa ka higayon niana samtang naghigda sila sa kama, may gipangutana si Pancho.

“Duna diay kay uyab didto sa inyo, Fel?” hinay nga namulong si Pancho.

“Oo, Panch. Si Tomas. Desisayis pa ko niadto. Maingon nga una ko siyang gugma, first love. Pero wala na man mi magkontakay sukad nga nahiabot ko dinhi sa siyudad ug nag-eskuyla na ko,” ni Fely nga mitakilid habig sa iyang bana nga naghayang nga naghigda.

“Okey lang na, Fel, sa usa ka dalaga. Ako bitaw, duna man sad koy unang gugma. Taga amo, pero wala na sad mi magkita. Ang importante, Fel, nga magtiayon na tang duha.” Ug gihagkan ni Pancho ang mga ngabil ni Fely.

Apan dakong demalas kay napusilan si Pancho ug ang bala didto motama sa iyang dughan. Nahitabo kini dihang ang kapulisan naghimo og ‘buy-bust operation’ batok sa tigpayuhot sa mga ginadiling drugas. May usa ka durugista nga armado nga mikalit pagpusil kang Pancho. Gidali siyag dala sa ospital sa iyang mga kaubang pulis, apan wala na siyay kinabuhi pag-abot sa tambalanan. Tungod sa nahitabo sa iyang bana nakahukom si Fely nga mopauli na lang sa ilang balangay sa Pulang Rosas aron adto niya inayanaya ang nagbangutan niyang kasingkasing tungod sa kamatayon ni Pancho. Dinhi nagkita silag balik ni Tomas nga ulitawo pa gihapon, kay wala manguyab og lain sukad kini mahibawo nga si Fely naminyo sa siyudad. Mipadayag pag-usab si Tomas sa iyang gugma kang Fely ug mihanggat nga magpakasal sila. Miuyon si Fely kay nakita niya nga buotan si Tomas ug kugihan uyamot kay dako kinig uma.

ANIA karon si Fely kuyog ni Tomas dinhi sa sementeryo sa Carreta. Nia siya karon sa tiilan sa lubong ni Pancho. Iyang gipahiluna ang dala niyang pungpong sa mga rosas diha sa ibabaw sa nitso ug miluhod siya human niya kadagkuti ang giugbok niyang kandila. Si Tomas diha magbarog duol sa kilid ni Fely.

Samtang nagluhod may gipamulong si Fely nga igo gayud nga madungog ni Tomas.

“Panch, Nobiyembre uno ron. Giduaw tika. Kuyog nako si Tomas ang giingon ko nimong akong first love. Siya na karon ang mohulip sa imong pagbiya kanako. Nakasal na kami, Pancho. Pinangga kaayo ko ni Tomas, sama sa pagpangga nimo kanako. Ayaw na kog hunahunaa. Pahuway na lang sa kalinaw. Kay okey na ang akong kahimtang.” Ug gitay-og ang abaga ni Fely sa usa ka masubsob nga pagbakho. (Katapusan)