LUYO sa natagamtamang hulaw sa probinsya sa Davao del Sur nilampos gihapon ang ubang mga mag-uuma sa pag-ani sa ilang basakan.
Bag-o lang nahuman og ani ang mga mag-uuma didto sa lungsod sa Hagonoy, Davao del Sur sama ni Joel Sanchez, kinsa nanag-iya og duha ka ektaryang basakan.
Apan, wa kini malipay sanglit nikunhod ang iyang abot itandi sa mga milabay nga ani.
Ni Sanchez pa nga 220 ka mga sako sa humay ang ilang abot sa milabay nga ani ug niabot ang iyang kita sa P100 mil, apan karon 170 ka sako na lang ug P70 mil na lang ang abuton niini, lugi siya og P30 mil.
Alang niya, ang kakuwang sa tubig hatod sa hulaw maoy usa sa mga rason nganong niubos ang ilang ani karon nga tuig.
Sumala sa mga mag-uuma nga gamay lang ang lining sa irigasyon sa ilang lugar ug nag-sustento kini og halapad nga ektarya sa mga basakan.
Apan wa nawad-i og paglaum ang mga mag-uuma sanglit dali silang nananom karon og water melon aron mahimong kapital nila ang abot sa sunod nga tanom sa humay.
Gibutyag sa Department of Agriculture sa rehiyon nga miabot og P126 milyones ang danyos sa pananom dinhi sa probinsya ug sa siyudad sa Davao.
Hinuon, didto sa lungsod sa Bansalan, Davao del Sur, mga mag-uuma nagbutyag nga wa pa sila naapektuhi sa hulaw human sila nakatanom niadtong bulan sa Setyembre.
Sa maong panahon bisan ubos ang ilang produksyon apan kay taas ang presyo sa humay atong panahona mao nga nakabawi gihapon sila.
Si Ernesto Miro, provincial agriculturist, nikanayon nga ang nakatanom niadtong Setyembre, naka-harvest na niadto pang bulan sa Enero ug Pebrero.
Karong sunod semana himuon na sa DA ang "cloud seeding" dinhi sa lalawigan aron matabangan ang mga mag-uuma nga makatilaw og artificial rain.
Gastusan og P3 milyones sa DA ang pagsabwag asin sa panganod ug himuon kini katulo sa usa ka semana sud sa usa ka bulan. (Orlando B. Dinoy)