Kyaw-Kyaw: Mga istorya nga katuho-an

NAKAHISGOT na man gyud tag Pasko, maghisgot sab tag unsay lagmit mokuyog sa Pasko. Usa niini mao ang Metro Manila Film Festival.

Kon tinuod man gani nga tumong sa mga prodyuser nga danihon ang mga bata pagtan-aw og sine (aron di makabalibad ang mga ginikanan), wa sab kini magkahulogan nga dalitan na lang sab ang mga makisine og mga salida nga, makaingon tang wa diri ug wa didto ang istorya.

Di baya makatan-aw ang mga bata nga sila ra. Kinahanglan baya ang mga dagko nga mokuyog ug mobantay nila.

Duna sab hinooy nindot og istorya ug gani nakadaug man og mga award. Makapaabot kaha tag mga pelikula karong tuiga nga molingaw di lang sa mga bata kon di sa tanan gyud nga mahiligon sa sine isip mabungahon nga pagpalabay sa oras?

•••

Nakahisgot ko dinhi og mga TV commercial diin mga bata ang mga modelo nga nakalingaw nako ug wa makaaghat pagbalhin sa laing istasyon. Pero duna say mga commercial nga, parehas sa nahisgutan sa unahan, di sab katuhoan ang istorya.

Parehas anang commercial og gatas nga bata ang endorser diin nagyawyaw ang bata sa mga nutrients. Makatuo kaha ta nga sa kalinghod, kahibalo na siya sa maong mga butang?

Laing commercial nagpakita sa mga bata nga niapil og bangga sa dagan. Dunay nadagma ug naumod ang dughan pero dihang gitabangan, gipatindog ug giubanan padulong sa finish line, nagtaki-ang man hinoon.

Commercial tinuod na pero hatagi sab ang mga tumatan-aw (ug posibleng pumapalit sa produkto) og istoryang mogitik sa utok. Anà.

•••

Nahinumdom ko sa press conference sa Buy Bust nga bida si Anne Curtis diin klaro kaayong nakapasapot sa aktres ang pangutana kon kanus-a makakita ang iyang mga fans og Anne Jr.

Gipalanog lang sa nangutana ang diha sa hunahuna sa mga fans ni Anne pero klaro nga na-pressure ang aktres.

Karon, di na gyud saputon si Anne kay nagsugod na pagbusyad ang iyang tiyan nga lima na ka bulan ang gisabak. Lakip kining tagsulat sa nalipay sa maong kalambuan.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph