SUPERBALITA CEBU

Tana! Libuton ta ang China

KON ang mga inilang suroyanan sa China sama sa Great Wall, Tiananmen Square, The Terracota Army ug uban pang iconic places gusto nimong adtuon, kuwangon ang imong usa ka semana sa pagsuroy ilabi na nahimutang sa nagkalain-laing probinsiya o dakbayan ang mga tourist spot.

Apan kon ikaw nagdaginot ug buot nimo nga sulit nga ma-experience ang China sud lang sa usa ka lugar, ang “Splendid China & Folk Culture Village” labing unang cultural theme park nga nagtanyag og 82 reproductions o gisunod sa paghimo ang mga sikat nga lugar sa maong nasud.

Wa pay labot sa mga kalingawan nga masiga ang imong mata ug mangangha ka sa dili kasagaran nga cultural presentation.

Sud lang sa usa ka adlaw imo nang makompleto ang imong bucket list sa paglaroy-laroy sa sud sa maong theme, water & amusement parks nga nahimutang sa Nanshan District, Shenzhen – China.

Ang “Splendid China” bukas matag adlaw gikan sa 9:00 sa buntag ngadto na sa 8:30 sa gabii sa kantidad nga ¥100~¥225 matag ticket (P725 – P1,630).

Unsay naa?

Gibahin sa duha ka areas ang 300,000 metro kuwadrado nga gilapdon sa maong theme park adunay miniature park ug China Folk Culture Village.

Ang miniature park maghatag og lawom nga pagsabot sa mga bisita kabahin sa China’s culture, history, art ug ang kinaraan nga architecture ug makat-unan usab ang naandan nga tradisyon ug kinaiya sa mga Instik.

Adunay 82 ka mga scenery, grand architecture, historical site ug ang kinaraan nga balay o struktura sa mga Chinese

Samtang sa folk culture villages adunay 27 ka ethnic villages nga makita ang nagkadaiyang ethnic group sa China, masaksihan sab ang performances nga nagpakita sa nagkalain-lain nilang festival dunganan na sa fireworks display ug water show diha sa lapad nga entablado.

Natural sa tanto ninyong suroy suroy sa lapad nga theme park ug nahurot ang iyang gibawon nga pagkaon, adunay restaurants, cafes ug food stalls nga makahupay sa inyong kagutom ug ka-uhaw.

Gawas pa, dili nato kalimtan ang souvenir shops kay ang maong theme park adunay tulo ka shops nga makapamalit mo og sa inyong ipasalubong, pwede ra mohangyo sa presyo ilabi na nga gidaghanan ang paliton.

Ato nang sugdan ang lakwatsa

Sagad sa mga sikat nga lugar nga inyong madungog mahitungod sa China inyong masud-ong sa “Splendid China” theme park.

Tungod sa kalapad sa area ang mga turista sa entrada pa lang human sa pagbayad sa inyong pulta hatagan mo og flyers nga adunay mapa ug interesting facts sa mga miniature site ug performance aron ma-guided mo og labaw sa tanan, dili mo magkasaag-saag pagbinaktas.

Sa kadtong adunay gipamate nga arthritis o rayuma ug sakit ilakaw adunay electric car, of course adunay lain bayad gawas sa inyong entrance fee.

Ang layout sa miniature structures/place gihan-ay base sa ilang location, pipila lang ka tikang inyo nang masuroy ang Forbidden City, Beijing lahos na ngadto sa Li River, Guilin patighulog sa Potala Palace, Tibet ug adunay bahin sa Yangtze River, Chongqing.

Makita sab ang world’s largest stone Buddha ang Leshan Giant Buddha dayon sa unahan ang world’s longest grottoes gallery ang Mogao Grottoes, Dunhuang, pipila lang kini sa inyong makita sa maong area.

Ginganlan sab ang maong miniature park og “Liliput” tungod kay gawas sa miniature structures adunay 50,000 ka mga gagmayng ceramic human ug animal figurines.

Mas mapalawman pa sab nimo ang pagsabot sa kultura ug kinaiya sa mga Tsino diin sa ilang Folk Culture Village makita ang museum sa 56 ka nagkadaiyang ethnic groups nga nahimong kabahin sa ilang kasaysayan.

Sa dayon nang kilum-kilum sa kalangitan dili dinhi matapos ang inyong katagbawan kay adunay mga live ethnic dance performances diin grandioso kaayo ang props ilabi na ang costumes nga gigamit sa mga performer.

Ma-feel nimo ang drama sa ilang gipasundayag gumikan sa modern sa ilang sound ug light effect.

Way uso ang duka kon ikaw motan-aw sa mga stage performance kay sound effect pwerting lanoga ilabi na nga adunay gipabuto nagtuo kang tinuod ang bomba ug nagtu-asik ang baga sa fireworks nga motugpa sa imong tungod.

Makahilam-os pa ka ilabi na sa atubangan nga audience atol Water-Splashing Festival sa Dai community, mawala ang imong kapungot kon ang imong sinina nabasa.

Kay kon ikaw masabligan sa tubig timaan nga makaangkon ka og abunda nga blessing.

Laing attraction

Wa ra mag-limit sa kultura ug kasaysayan ang maong park kay adunay pay laing makalingaw nga atraksiyon kay naa sab silay Derung Zipline, nga adunay 10 metro ang gitas-on og imong malantawan ang bahin sa maong park nga daw naglupad

Gawas sa kawanangan aduna sab boat ride ngadto sa River of Love, samtang sa inyong pagbugsay bugsay dunganan kini sa huni sa mga ibon sa inyong paglawig ngadto sa kakahoyan nga bahin sa park.

Kuwangon ning atong pahina kon isaysay ko pa ang tanan nga akong kasinatian, kamo nay bahala sa inyong pagsuroy-suroy ug ako nakasiguro nga dili kamo magminghoy.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph