DALI ra man kaayong napakgang ang pamahayag sa tulo ka dagkung opisyal sa Cebu City Sinulog Governing Board (CCSGB) nga mibandilyo nga sila maoy hawod niining umaabut nga kasaulogan sa Sinulog 2020. Sa usa gud ka press conference gipahibawo nila ni CCSGB executive director Barney Borja uban kang Project director Val Sandiego ug Kenneth Cobonpue nga sila sa governing board maoy magbuot sa tanang kalihukan sa Sinulog 2020 nga dili na magkinahanglan og pagtugot sa Sinulog Foundation, Inc. (SFI).
Apan pagka-ugma gisupalpal sila ni CCSGB Chairman Mayor Edgardo Labella. Sumala sa mayor nga walay molabaw sa CCSGB ug SFI. Ang prayoridad sa governing board mao ang peace and order, disaster preparedness, traffic management ug uban pang kalihukan para sa Sinulog. Gipadayag sa mayor nga unsay nasabutan sa SFI, tahuron kini sa governing board. Hinaut pang magtudlo sila og tigpamaba aron dili bisan kinsa lang ang makapagarpar og dili mao.
•••
Unsa man gayud ang solusyon ni Bise Presidente Leni Robredo sa grabeng problema sa ilegal nga drugas? Ang una niyang sugyot nga hunongon ang tokhang kun pagpamatay sa nalambigit sa ilegal nga drugas. Nagtuo ba ang bise presidente nga mahunong kining pagpamaligya ug pagamit sa ilegal nga drugas kon wala nay patay? Buot usab niyang walay dalang armas ang kapulisan nga mohimo’g operasyon. Magpatara ba lang ang mga pulis kon mamusil ang pusher?
Makig-estorya usab kuno siya sa mga representante sa United States (US) ug sa United Nations (UN) aron masayud siya sa best practices o sa maayong binuhatan sa maong mga nasud batok sa ilegal nga drugas. Kining maong mga nasud wala usab makasulbad sa ilang problema sa ilegal nga drugas. Gani ang ubang mga nasud midayeg sa kampanya ni Presidente Duterte batok sa illegal drugs. Nahadlok ko nga makalugar na hinuon pag-apil-apil kining maong mga nasud sa atong kampanya.
•••
Kinahanglang desisyunan na sa Local Water Utilities Administration (LWUA) ang isyu sa pagtangtang ni Cebu City Mayor Edgardo Labella sa mga sakop sa board of directors sa Metropolitan Cebu Water District (MCWD). Importante kaayo nga ang bag-ong board makalihuk dayon aron ilang ma-rehabilitate ang wells nga gigastuhan sa MCWD nga wala na magamit tungod sa pollution ug ubang katarungan. Angayan usab nga sulbahon sa wáter district ang wala papagamit sa Municipality of Compostela sa 17 ka wells nga migasto og $14 million. Kinahanglan na usab nga ayuhon ang mga mainline nga nangalata na. Ang paglihuk niini maoy makadugang sa tubig sa MCWD inay nga mamalit og tubig gikan sa ubang tinubdan nga mahal kaayo og kadudahan nga anaay naka-kwarta. Ang mga kunsomidor usab ang nagbayad niining mga proyekto sa MCWD nga way bisan usa ka tulo nga tubig. Kini ang labing grabeng pagtamas-tamas sa MCWD ngadto sa ilang mga kliyente. (mannyrabacal1144@gmail.com)