Barrita: Tinuod nga dagway ni Lapulapu

ANG katiguwangan sa akong kaliwat sa mother side, ang mga Ochea sa Opon, niingon nga mga kaliwat sila ni Lapulapu. Mao na nga gusto kong masayod kon unsay tinuod nga dagway ni Lapulapu. Ang nakaparat kay wa siya magpakodak kay wa pa man say kodak adtong panahona.

Sa Mactan Shrine, ang estatuwa ni Lapulapu morag dagway ug pamayhon sa Amerikanong aktor nga si George Hamilton. Sa atubangan sa Kapitolyo, ang estatuwa ni Lapulapu parehog pamayhon ni Eddie Gullas, kanhi gobernador ug karon kongresista sa primero distrito sa Sugbo.

Kay wa may nakakita ni Lapulapu, ang mga eskultor nag-agad na lang sa ilang kopyahan nga modelo. Kon si Rod Ngo o kaha si Dave Cua pay ilang modelo sa mga estatuwa ni Lapulapu, hikot unta og mata si Lapulapu.

•••

Gilalisan pa kon lumad ba gyud si Lapulapu sa isla sa Opon. Dunay nag-ingon nga gikan sa Borneo si Lapulapu ug human sa Battle of Mactan nipauli siya didto. Dunay niingon nga Bol-anon si Lapulapu ug gisuholan lang og buwad aron makig-away ni Ferdinand Magellan.

Nagtangag og dakong kwestyon ang estorya nga gisuholan lang si Lapulapu og buwad. Unsa mang klaseha sa buwad, danggit? Kon buwad danggit man gani, modawat kaha si Lapulapu niini nga mas lami pa man ang isdang lapu-lapu kay sa danggit?

Pero ato-ato lang ni kay masuko ra ba si Kongresista Paz Radaza nga himuong isda si Lapulapu. Hasta si kanhi Cebu Customs Collector David “Boy” Odilao Jr. di mosugot nga ang isdang pugapo tawgon og lapu-lapu.

•••

Ang Simbahang Katoliko magsaulog sa quincentennial anniversary, sa ika 500 ka tuig, sa Kristiyanismo sa Pilipinas karong 2021. Kini tungod kay ang Portuguese explorer nga si Ferdinand Magellan nga naglayag ubos sa bandera sa Spanish Empire, nidunggo man sa atong kabaybayonan sa 1521.

Niadtong Abril 14, 1521, si Rajah Humabon sa Sugbo, ang iyang asawa ug mga ginsakopan nagpabunyag sa tinuohang Katoliko sa mga Espanyol. Pero si Humabon ra sab ang nagtiwas pagpuo sa nahibilin nga mga Espanyol sa Battle of Mactan sa Abril 27, 1521.

Dako kini nga selebrasyon sa Simbahan. Pero lagmit nga hikalimtan na lang si Lapulapu niini kay duna nay plano nga ang iyang estatuwa tangtangon sa Mactan Shrine ug ipadaplin na lang sa usa ka suok.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph