Editorial Cartoon by John Gilbert Manantan
Editorial Cartoon by John Gilbert Manantan

Editoryal: Gamit sa garbage trucks

GIPANEGURO ni Mayor Edgardo Labella nga dako og madaginot ang Dakbayan sa Sugbo sa pagpalit niini sa 21 ka garbage compactor trucks. Ang mga trak, nga napalit sa administrasyon ni kanhi mayor Tomas Osmeña, gipanghatod na ning semanaha ngadto sa City Hall.

Kon tinuod nga makadaginot ang Siyudad og P50 million, mas labing maayo. Kon epektibo nga ang Siyudad na lay mohakot sa tanang mga basura gikan sa balay ngadto sa transfer station ug gikan sa transfer station ngadto sa landfill, mas labing maayo. Unsa kaha ka maayo kon dugangan ang gidaghanon niini aron di bugbog sa paggamit ang mga trak? Samtang gipaubos sa maintenance ang pipila, duna dayoy ikapuli.

Kon ang Siyudad nay mohakot sa tanang mga basura, mahanaw na ang pagduda sa publiko nga dunay namilyonaryo sa basura. Kay kada tuig, sa panahon pa ni Osmeña, ang gahin sa paghipos midoble, mitriple. Nasukwahi kini sa iyang pagpanaway kaniadto sa panahon ni kanhi mayor Michael Rama nga iyang gitumbok nga dako og gasto sa paghipos sa basura. Sa iyang pagpuli, misulbong na hinuon og maayo ang budget samtang ang publiko wa makakita og maayong kalamboan sa paghipos sa hugaw. Naay mga nagduda nga dunay nakakwarta sa basura.

Ang madaginot sa paghipos magamit sa laing katuyoan. Sama sa pagpalambo sa serbisyo sa Cebu City Medical Center (CCMC), bugtong ospital nga madangpan sa mga kabos sa dakbayan. Dako na ni og matampo alang sa pagpalambo sa mga ekipo ug tambal sa ospital. Importante ang medical services sa usa ka siyudad, sama sa Cebu City, nga palambuon kay daghang mga kabos ang nanginahanglan niini.

Apan di usab angay nga ang pagdaginot lang ang tan-awon sa mayor. Angay usab niyang bantayan kon ang paglunlon nga publiko sa paghakot sa basura makaayo ba sa Dakbayan. Kay naila baya ang ubang mga kawani sa kagamhanan sa kataspukan.

Related Stories

No stories found.
SunStar Publishing Inc.
www.sunstar.com.ph