KAPULISAN sa dakbayan ang nipahimangno sa publiko, ilabi na niadtong magdala og dagkung kantidad sa kwarta ug mga mag-alahas, nga magbinantayon sa mga mangingilad.
Ilabi na nga nagsingabot ang Pasko nga sagad maoy paggara sa mga mangingilad.
Kini human nga usa ka senior citizen ang gihimolbolan sa iyang mga alahas nga gibana-banang mobalor P60,000.
Ang 70 anyos nga biktima, Erlita Lueria, taga Kimba, Barangay San Roque, Dakbayan sa Talisay, nidangop sa Talisay City Police Station Miyerkules sa hapon, Nobiyembre 13, aron pagpa-blotter.
Kini human nga nabiktima siya sa mga mangingilad sa usa ka mall sa Barangay Tabunok, Dakbayan sa Talisay.
Ang biktima nisaysay ngadto sa mga pulis nga samtang naa siya sa mall, iyang nahimamat ang usa ka babaye nga nagpaila sa ngalan nga Lilia Lopez.
Nipaila kini nga amiga sa iyang anak nga naa sa gawas sa nasud.
Giingon nga gipakuyog siya sa suspek ngadto sa parking area sa mall kay giingon nga adunay ipakuha nga package alang sa biktima nga gikan sa iyang anak.
Giingon nga anaa kini sa iyang sakyanan sa parking area.
Apan sa pag-abot sa parkingan, duha ka mga lalake ug laing babaye nitagbo kanila ug nakig-estorya kang Lueria.
Gihulagway sa biktima nga gilibog siya hangtud nga wala siya kasabot kon ngano nga iyang nahatag ang iyang singsing, kwentas, relo ug P5,000 nga kwarta.
Iyang gibana-bana nga moabot tanan og P60,000 ang balor sa mga alahas nga iyang nahatag sa mga mangingilad.
Way nahatag nga package nga giingong gikan sa iyang anak.
Sa dihang gipatan-aw sa biktima ang rouges gallery sa mga dinakpan sa mga pulis kaniadto nga adunay susama nga modus, usa sa mga nangilad niya ang nailhan nga anaa ang hulagway.
Ang kapulisan sa Talisay ang nihimo og lawom nga pakisusi kalabot sa pasangil ni Lueria, sama sa pagsusi sa kuha sa closed-circuit television (CCTV) sa mall, kon nakuhaan ba ang panghitabo aron sa pag-ila sa mga mangingilad.