LAING tulo na usab ka kawani sa Lapu-Lapu City Government ang nagpositibo sa paggamit og gidiling druga.
Kini base sa migawas nga resulta sa labing uwahing drug test nga gipasiugdahan sa City Of Lapu-Lapu Office of Substance Abused and Prevention (C-Losap).
Matod ni Lapu-Lapu City Mayor Junard “Ahong” Chan ang tulo nga nagpositibo nalakip sa mga kawani sa General Service Office GSO, IT Department ug Public Information Office (PIO) nga gipaubos sa kinalit nga drug test niadtong Nobiyembre 8, Biyernes.
Sama sa nangaging nagpositibo sa ginadiling drugas atol sa drug test pagkatak-tak usab sa trabaho ang silot nga madawat sa 3 ka kawani.
“Pending confirmatory test pero ug makita nga sad-an aw taktak gyud sila ato silang gipatawag pero wala sila mopakita nato dihang atong gipatawag,” matod ni Chan.
Si Garry Lao ang pangulo sa C-Losap mibutyag nga moabot na sa 1,391 ka mga empleyado sa 8 ka mga buhatan sa city hall ang ilang napaubos sa drug test sukad Hulyo 1.
Ang 18 niini ang nagpositibo apil na ang bag-ong tulo nga kawani. Gibutyag ni Lao nga sa 18 usa lang ang niduol kaniya ug mipadayag nga andam magpa-rehabilitate. (GCM)