PADAYONG giobserbahan sa mga doktor sulod sa pribadong tambalanan ang kanhi station manager sa FM radio human siya nabanggaan og motorsiklo dihang nitabok sa eskina sa dan Gorordo ug dan Kamagong, Barangay Lahug, dakbayan sa Sugbo niadtong Miyerkules sa gabii, Nobiyembre 13.
Ang biktima mao si Pastor Raul Roxas, Jr., 52, kanhi manager sa Wild FM Retro Cebu ug Home Radio, ug karon pastor sa My Father’s House of Worship sa Barangay Lahug.
Ang motorsiklo nga nakabangga gimaneho ni Nicole John Mendoza, 21, taga Barangay Bulacao, siyudad sa Sugbo, kinsa gitanggong karon sa Mabolo Police Station.
Sa imbestigasyon ni PSsgt.Jacinto Arado Jr. sa Traffic Police Group (TPG), si Mendoza gikan sa Barangay Busay ug dunay angkas.
Nahitabo ang aksidente duol sa skywalk sa Lahug Elementary School ug barangay hall sa Lahug.
Sa pag-abot sa medical team sa Emergency Response United Foundation (Eruf), ang biktima nagping-it sa kasakit sa iyang ulo nga nabunal sa dan.
Sumala sa mga nakasaksi, kusog ang pagpadagan ni Mendoza uban sa iyang angkas nga si Nyaha Gillian Gonzales, 18, ug taga Bulacao.
Dugang sa taho, sama sa nakigginukdanay kini sa laing motorsiko. Apan si Mendoza nihimakak sa dihang gikuhaan siya sa iyang habig.
”Hinay ra jud to akong dagan, Sir, wala gali ko matumba. Duna koy saksi ana, Sir,” matod ni Mendoza.
Giangkon niya nga gikan sila nag-inom dapit sa Balwarte, tambayanan sa mga riders, sa iyang mga barkada nga susama ug niingon nga dili siya hubog. Si Mendoza gitanggong sa Mabolo Police Precinct 4. (BBT)