DI NA usbon o hilabtan ang estatuwa ni Lapulapu nga nahimutang sa Liberty Shrine sa Brgy. Mactan, Dakbayan sa Lapu-Lapu sukwahi sa unang plano.
Kini ang gipahibawo sa National Historical Commission of the Philippines (NHCP) atol sa ilang gipatawag nga press conference sa Huwebes, Nobiyembre 14, 2019.
Matod ni Dr. Rene Escalante, chairperson sa NHCP, taas na ang proseso kon hilabtan o ibalhin pa ang estatutwa ni Lapulapu. Sama sa pag-reclaim ug pag-develop sa lugar nga kinahanglan pa og permit ug malangay pa.
Hinungdan nga nadesisyonan na sa NHCP nga buhatan og usa ka shrine ang dapit nga nahimutangan sa kasamtangang estatuwa sa pagkakaron.
Ang shrine closed -door nga estraktura diin ibutang sa sulod ang kasamtangang estatuwa.
Mokabat og P105 milyones ang buget nga gitagana sa NHCP.
Sa uwahing bahin karong tuiga magpahigayon ang NHCP og design-making contest sa shrine diin ang ilang mapilian mao ang mahimong desinyo sa tukoron sunod tuig.
Di pa usab makabutyag si Escalante unsa ang gidak-on sa shrine nga mobarog sa naandan karong nahimutangan sa estatuwa ni Lapulapu apan, posible nga ang estrakturang tukoron moabot duol sa baybayon.
Ang pagpanindot sa shrine subay na sa pagpangandam sa ika-500 ka tuig nga kasumaran sa Kadaugan sa Mactan sa 2021.
Saulogon usab ang ika 500 nga kasumaran sa pagka Kristiyanos sa nasod nga nagsugod dinhi sa Sugbo sa pag-abot ni Ferdinand Magellan.
KarongDisyembre 14 mao na ang 500 ka adlaw nga countdown sa kalihukan diin gikatakdang motambong si Presidente Rodrigo Duterte.
“We will design the shrine so that wherever you are in the museum, you can see the monument. It’s an open thing that you can see. In fact, I am proposing na i-demolish ang nga shop para kahit nasa karsada ka, makita mo ang mga elemento sa shrine, the monument, the flag” matod ni Escalante.
Si Lapu-Lapu City Mayor Junard Chan, sa iyang bahin, nipadayag nga susihon pa sa Dakbayan kon unsa ang ilang mahimo sa mga ma-demolish nga estraktura sa pagpanindot sa nahimutangan sa estatuwa.
Kini human nga nakadawat si Chan og taho nga adunay pipila ka mga tindahan sa lugar nga nangankong adunay titulo sa yuta sa dapit.
Nahibung si Chan sanglit ang lugar iya sa City Government.
Alang sa mga ma-demolish usab nga mga souvenir shop, kini ibalhin i-relocate aron malimpyohan ang barogan sa Shrine ni Lapu-Lapu.
“Naay nakahimo og titulo sa atong kabaybayonan. That’s why ang city mag study unsaon nato na pagbawi,” matod ni Chan.