GIPALUKAPA sa Ormoc Community Multi-Purpose Cooperative kun (OCCCI) ang University Of San Carlos Multi-Purpose Cooperative (USC-MPC), 95-76, samtang gimakmak usab sa Cebu CFI Community Cooperative ang First Community Cooperative (FICCO), 102-80 sa Cebu City Inter-Coop Basketball & Volleyball Tournament 2019 diha Cebu City Sports Institute (CCSI) niadtong Domingo.
Nangulo sa OCCCI si Jim Taala nga may 26 puntos upat niini tres sa final period, inabagan ni Jerry Misa nga mipuntos og 18 sulod sa second half.
Naglabaw unta ang USC og 22 puntos sa pagtapos sa second quarter apan miratsada ang OCCCI sa second half.
Samtang way dag-anan ang FICCO sa mga batos sa Cebu CFI nga gilangkuban sa mga kanhi USC warriors nga sila Ian Ortega ug Vernie Tangarorang pinaagi sa 35 points nga kombinasyon sa duha nga maoy naghatud sa kadaugan sa torneyo nga kabahin sa kalihukan sa Coop Month.
Sa volleyball, nagpabiling limpiyo ang record sa defending champion nga Equitable PCIB Cooperative, 2-0, human nila mapukan ang higpit nga karibal nga Guadalupe Community Cooperative, 2-1. Naangkon usab sa CEMVEDCO ang ilang back-to-back win sa maong adlaw human nila pildeha ang USC-MPC ug FICCO sa straight set. Nagtabla karun ang Equitable ug CEMVEDCO sa unang luna sa standing nga adunay 2-0 nga baraha.
Ang maong torneyo gipasiugdahan sa kagamhanan sa Dakbayan sa Sugbo pinaagi sa Cebu City Cooperative Development Council (CCCDC) nga gipangulohan ni Konsehal Jerry Guardo isip kabahin sa kalihukan sa Cooperative Month 2019. (PR)