GIBANA-bana nga moabot og P460,000 ang danyos sa sunog sa Huwebes sa hapon, Nobiyembre 14, sa Barangay Casuntingan, Dakbayan sa Mandaue.
Base sa inisyal nga report nga adunay labing 200 ka mga pamilya ang nawad-an og panimalay sa sunog nga nakapa-abo sa 100 ka mga balay.
Ang sunog giingong nagsugod sa balay ni Lene Calipes, 2:02 sa hapon.
Daling miresponde ang Mandaue City Bureau of Fire Protection (BFP) human makadawat sa alarma mga alas 2:07 sa hapon.
Gisaka ang sunog ngadto sa 4th alarm alas 2:26 sa hapon apan nakontrolar dayon alas 3:17.
Napawong sa BFP ang sunog alas 6:45 sa gabii.
Ang ubang balay gama lang sa light materials ug adunay mga gama sa semento.
Sa pagkakaron, giimbestigar pa kon unsay hinungdan sa pagsila-ob sa kayo. (KFD)