SUPERBALITA DAVAO

Compio: Tiunay nga kalipay

Tipik Sa Kagahapon

PAUNSA kaha nato hikaplagan ang usa ka kalipay diha sa gugma kung gibalot lamang kini sa mga kasakit?

Sa akong mahiligon nga panukiduki sa kalibutan sa internet, diha ko’y nabasahan nga usa ka istorya sa usa ka mag-uuma.

Didto sa usa ka bukid sa Engglatera, ang maong mag-uuma, nag-inusara sa iyang kinabuhi sa iyang pangerdaron nga 60-anyos.

Dihang iya nang hawanan ang mga punoan sa iyang tinanom nga mga kamatis, nasantop sa iyang hunahuna nga ang mga sagbot diay igsama sa mga pagsulay sa kinabuhi.

Nakasulti siya niini, gumikan iyang gibiyaan ang siyudad ug mipuyo sa bukid nga nag-inusara tungod sa iyang mga kapakyasan sa gugma. Nagtuo siya, nga ang pagpalayo maoy usa ka nag-inusarang butang nga mahikalimtan niya ang mga nangagi.

Iyang nahunahunaan nga ang iyang padayong pagpangibot sa mga sagbot, maoy subling makapabanhaw sa iyang mga kaagi.

Bisan og giunsa niya’g hawan ang iyang galamhan, moturok gihapon ang mga pagbati sa nangagi nga padayong anaa sa iyang kasingkasing; padayong ania kanato nga bisan gilingaw na kita sa mga takna, anaa gihapon nga mipahipi sa atong mga dughan.

Sa laktud ning tanan, makab-ot lamang gyud nato ang kalipay kung atong nadawat ang kamatuoran. Hinuon, sakit bation, ug sa paglabay sa mga katuigan mawala ang pagbati, apan nagpabilin kining buhi diha sa atong panumdoman.

Isipa lamang nga kabahin kining tanan sa sadya nga mga yugto sa atong kinabuhi, mapasalamaton kita nga miabot sila ug atoa silang nakaila.

Ang pag-ampo sa Diyos ug ang pagsalig sa kaugalingon ang makahaw-as kanato gikan sa kangitgnit sa pagbati ug sa mga kasakit.

Bulahan kitang tanan nga mibati og kasakit kay ugma damlag mobidlisiw ang bag-ong paglaum nga maoy modala kanato ngadto sa way-kinutuban nga kalipay.

Hangtud sa sunod Biyernes mga higala, daghang salamat sa inyong makanunayon nga pagsunod ning atong lindog.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph