Air-to-ground assault gilusad batok sa BIFF

 (PNA)
(PNA)



MAGUINDANAO PROVINCE -- Subling nilusad og air-to-ground assault ang militar batok sa mga sakop sa Bangsamoro Islamic Freedom Fighters (BIFF) nga nagsugod alas 5 sa kaadlawon hangtud alas 9 sa buntag Huwebes, Nobyembre 14, sa duha ka mga barangay sa Shariff Saydona Mustapha sa probinsiya.

Sa taho gikan sa 601st Brigade, Philippine Army, nasayran nga puntirya sa militar ang gitagoan sa grupo ni Shiekh Esmail Abdulmalik alyas Kumander Abu Toraife nga giingong inspired group sa Islamic State of Iraq and Syria (Isis) sa mga barangay sa Bakat ug Ganta sa nahisgutang lungsod.

Una nang na-engkuwentro sa mga sakop sa 33rd Infantry Battalion ang mga BIFF sa Barangay Tukanalipao, Mamasapano niadtong niaging adlaw diin pito sa mga sakop niini ang napatay samtang 11 ang naangol.

Napatyan sab ang mga sundalo nga si Sergeant Randy Alivar samtang duha ang samdan.

Apan sugod niadtong panahona, wala na lung-i sa militar ang paglutos sa tulo ka pundok sa BIFF nga nagtago-tago sa mga hilit nga dapit sa SPMS Box ug Liguasan Delta sa diha nga natumbok nga nagtago ang gatusan ka miyembro niini sa nahisgutang mga barangay, gi-bombahan na kini sa mga sundalo gamit ang 105 mm Howitzers Cannon.

Samtang niabag sab ang duha ka MG-520 Attack Helicopters sa Philippine Air Force.

Moabot na sa siyam ang patay sa BIFF sa bag-ohay nga engkuwentro.

Hangtud niining pagsuwat sa balita, padayon nga gilutos sa mga sundalo ang mga terorista sa utlanan sa probinsiya ug sa Pikit, North Cotabato. (Edgar E. Fuerzas)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph