(File photo)
(File photo)

2,500 kompirmadong kaso sa dengue sa Davao City

NIABOT na ang nakompirmang kaso sa dengue sa dakbayan sa Davao sa 2,500 sukad Oktubre 2019, base sa datus sa City Health Office (CHO).

Sumala sa CHO, ang kaso sa dengue sa dakbayan niabot sa kinatibuk-ang sumada nga 2,481 nakompirmang kaso sa unang 10 ka bulan karong tuiga. Ang bulan sa Agosto nakatala sa pinakadaghan nga kaso nga niabot og 505.

Ang ihap mas taas itandi niadtong 2018 nga dunay kinatibuk-ang 1,609 sa maong panahon. Samtang ang kinatibuk-ang ihap sa kasong dengue sa nilabay nga tuig niabot og 1,820.

Samtang ang dakbayan, nakatala og siyam ka patay sukad Oktubre karong tuiga. Ang ihap mas ubos itandi sa niaging tuig nga 14.

Ang CHO nag-ila sa mga dengue hotspots sa mga distrito sa Talomo North, Toril, Agdao, Talomo Central, ug Buhangin.

Gitaho sab niini nga duha ka pasyente namatay niadtong niaging bulan. Sumala sa ilang health worker, ang bag-ong namatay nagpuyo sa Mintal sa Tugbok District.

Apan ang edad ug pagkatawo padayon pang gisubay.

Si CHO technical division chief Julinda Acosta nagsulti nga ang pagtaas sa ihap sa mga kaso sa gilauman na ilabi na sa Agosto hangtud na sa Nobyembre tungod sa ting-ulan.

Apan gikanayon ni Acosta nga ang city health nag-usab na sa ilang estratihiya sa ilang kampanya tungod kay ang kagaw “endemic” na o naa na sa “rampant” sa tibuok tuig. (Ralph Lawrence G. Llemit)

Related Stories

No stories found.
SunStar Publishing Inc.
www.sunstar.com.ph