USA ka team sa campaign volunteers ni House Speaker Prospero Nograles gihasi ug gisakmit ang ilang gisakyan sa mga sakop sa rebeldeng New Poeple's Army (NPA) niadtong Huwebes.
Ang insidente nahitabo sa alas 11:45 sa buntag didto sa Sitio Manipis, Barangay Paradise Embak, distrito sa Paquibato, siyudad sa Davao.
Base sa spot report sa Paquibato Police Station, gipahunong sa wala masayri nga gidaghanon sa mga armadong rebelde ang gisakyan sa mga volunteers ni Nograles nga Nissan Frontier Navarra nga dunay plate number LGN-855.
Sakay sa maong sakyanan mao sila Ramon Garcia ug Joel Yamyamin nga maoy nangulo sa pagdala sa mga campaign materials ni Nograles didto sa Paradise Embak.
Mga rebelde nga naghimo sa maong pagpanghasi giingong sakop sa Pulang Bagani Command (PBC) 1 nga gipangulohan ni Leoncio Pitao, alyas Kumander Parago.
Ang pundok ni Parago mipakanaog nila Garcia ug Yamyamin dihang miabot sa gimuntar nga checkpoint sa Sitio Manipis ug gikuha ang sakyanan nga puno og mga streamers, candies, kalendaryo, t-shirt, tooth brush, tooth patse, ug uban pang mga campaing paraphernalia nga dunay hulagway ni Nograles.
Nasayran nga alas 12:30 sa udto gidala sila Garcia ug Yamyamin sa usa sa mga lugar sa siyudad sa Panabo ug didto sila gibuhian sa mga rebelde.
Ang maong insidente giangkon sa Pulang Bagani Command (PBC) 1 Southern Mindanao Regional Party Committee (SMRPC) pinaagi sa ilang tigpamaba nga si Ka Simon Santiago, sigun sa pakighinabi sa GMA News.
Si Santiago nagbutyag nga ilang gisanta ang mga sakop ni Nograles gumikan kay nakalapas sila sa balaod bahin sa patas nga pagpangampanya.
Si Santiago midugang nga ilang gibuhian ang duha ka mga sakop ni Nograles human gipasidan-an nga makigsabot kanila ang ilang agalon bahin sa Permit to Campaign.
Ang sakyanan, suma ni Santiago, mamahimo na kining makuha ni Nograles bisan unsang orasa gikan sa ilang poder.
Gitawgan sa Superbalita kagahapon ang kampo ni Nograles aron kuhaon ang ilang reaksiyon sa maong hitabo apan dili pa sila makahatag og pamahayag bahin niini.
"Sa pagkakaron, dili pa mi makahatag og statement regarding sa incident, but rest assured you will get our side," pahayag ni Boy Tamayo, tigpamaba ni Nograles. (AD)