PATAY ang usa ka kargador sa patalan human siya napusilan sa security guard dihang nanguha siya og mga scrap iron sulod sa container yard nga gipanagiyahan sa Sulpicio Lines niadtong Huwebes.

Ang insidente nahitabo sa alas 8:00 sa gabii didto sa Sasa Wharf, Barangay Sasa, siyudad sa Davao.

Si SPO2 Henry Balbiran, imbestigador sa Sasa Police Station, nag-ila sa biktima nga mao si Gaudioso Alibangbang, 30, minyo, kargador sa Davao Integrated Port and Stevedoring Services Corporation (Dipsscor) ug nagpuyo sa Parola, Barangay Sasa.

Matud ni Balbiran nga ang biktima nasiplatan nga nanguha og mga puthaw sulod sa container yard sa Sulpicio Lines mao nga napusilan siya ni Renante Palacio, 30, sakop sa Superior Security Agency.

Si Alibangbang giingon nga gibadlong sa maong gwardiya apan wala mipatuo mao nga napusilan siya tumong sa iyang walang ilok nga miresulta sa iyang kamatayon.

Tungod sa maong hitabo, boluntaryong mitahan sa iyang kaugalingon si Palacio uban sa iyang service firearms

nga .38 caliber revolver nga dunay serial number 1069926.

Samtang gihaya ang biktima sa St. Peter Funeral Homes, gikustodiya sab ang suspetsado sa Sasa Police Station.

Sa pagsuwat ning balita, giandam na sa kapulisan ang kasong homicide batok sa suspetsado aron ipasaka ngadto sa korte. (Alger Dura)