KRITIKAL ang kondisyon sa usa ka ulitawo human milala og hilo niadtong Huwebes nga alas 6:00 sa hapon sa lungsod sa Manolo Fortich, Bukidnon.
Nilanding sa Northern Mindanao Medical Center (NMMC) ning siyudad sa Cagayan de Oro ang biktima nga giilang si Christian Derado, 22, ulitawo sa susamang dapit.
Gibutyag sa higala sa biktima nga posibleng gugma ang hinungdan sa pagsuway niini og hikog tungod kay niadtong Miyerkules pa kini gibulagan sa iyang uyab.
Nasayran nga sugod pa sa high school kini nga uyab ni Derado gani nagplano na ang duha nga magminyo apan gibulagan kay gustong moadto sa Manila ang uyab niini.
Gituohang dili madawat ni Derado ang nahitabo ug giingong nagsige kini og inom. Niadtong Huwebes miinom og hilo ang biktima.
Nagbula ang baba sa biktima dihang nakita sa igsuon niini hinungdan nga gidala sa duol nga balay tambalanan apan gibalhin ning siyudad.
Nasuko usab ang inahan niini nga tua gawas sa nasod sa gihimo sa anak.
Hinuon ning panahona padayon pang giatiman sa mga doctor ang biktima. (Stephanie V. Berganio)