Planuhon daan ang mga lakaw tungod sa paghuot sa trapiko.
Kini ang gipahimangnuan sa City of Talisay Traffic Operations Development Authority (CT-Toda) sa mga motorista nga moagi sa Cebu South Coastal Road tungod sa ipahigayon nga Torch Relay sa 30th Southeast Asian (SEA) Games karong Sabado, Nobiyembre 16, 2019.
Matod ni Jonathan Tumulak, CT-Toda head, mas maayong mosayo sa paglakaw ug dili na magpaabot pa nga maabtan og alas 12 sa udto.
Ang dalan paingon sa Dakbayan sa Sugbo kun sa Norte mao'y abli nga himuon og two-way lane.
"Mopakatap ta sa maong dapit sa atong mga traffic enforcer kay maapektuhan man gyud ta. Sa Cebu City nga habig ang sirad-an, apan konektado man ta. Ato awhag nga planuhon na daan ang ilang byahe, aron dili matanggong," pasabot ni Tumulak.
Ang pasirado gikan sa eskina SM Seaside paingon sa taytayan, boundary sa Talisay ug Cebu City.
Samtang nagkatgabo na sila Talisay City Mayor Gerald Anthony Gullas ug representante sa Department of Public Works and Highways (DPWH) Central Visayas kalabot sa reklamo sa mayor sa wala paghatag og abiso sa gihimo nga pagsirado sa usa ka habig sa taytayan sa Barangay Bulacao kay gipatrabaho bisan pa man kon sa habig na sa Cebu City sa national highway.
Gipasabot sa mayor nga apektado ang Talisaynon sa nasinati nga paghuot sa trapiko.
Gitug-an ni Gullas nga atol sa ilang tigum, Biyernes sa buntag, Nobiyembre 15, nagkasabot na sila nga ang pagpatrabaho himuon sa alas 9 sa gabii hangtud sa alas 5 sa kaadlawon.
Kini aron usab magamit nga alternatibo nga agianan karong Sabado, panahon sa pagsirado sa CSCR.
Dugang sa mayor nga pasalig sa DPWH Central Visayas nga humanon ang pagpatrabaho sa Disyembre 15, 2019. (FMD)