HUMAN gisalikway sa iyang mga kanhi teams, nakakita na gyud og kapasilongan si Carmelo Anthony, ang ika-19 nga leading scorer sa kasaysayan sa NBA.
Ang 35-anyos nga Anthony miuyon nga mopirma og non-guaranteed nga kontrata sa naghingutas nga Portland Trail Blazers, matod pa sa taho ni Adrian Wojnarowski sa ESPN.
Si Anthony nawala sa NBA sukad kini makapakita og aksyon sulod sa napulo ka duwa ubos sa Houston Rockets sa sayong bahin ning season.
Katapusan mao niadtong Nobiyembre 8, 2018 diin usa lang ang iyang napasulod sa tulo ka field goal ug mitali og dos puntos sa kadaugan sa Houston, 98-80, sa dihang misulong sila sa Oklahoma City.
Sukad niadto giapil siya sa inactive list sa team hangtod nga gi-trade siya ngadto sa Chicago Bulls sa Enero 22 baylo sa duha ka European players.
Apan nianang Pebrero 1, ang gi-waived siya sa Bulls.
Ang 10-time All-Star nga Anthony nahimong scoring champion sa 2012-2013 season diin siya nag-averaged og 28.7 puntos sa New York Knicks.
Ang Denver Nuggets mihulbo kaniya isip ikatulo sa overall pick sa 2003 draft ug didto nakaduwa siya og pito ka season ug tung sa wa pa siya mabalhin sa Knicks.
Unom ka tuig og tuna sa Knicks, si Anthony nahitapon na usab sa New York ug dayong gibalhin sa Oklahoma City sa wala pa ang iyang hamubong pagpakig-uban sa Rockets. (JBM)