DEAD on the spot ang usa ka taxi driver human giluthang kagahapon mga alas 6:40 sa buntag sa Barra lungsod sa Opol Misamis Oriental.

Giila ang biktima nga mao si Danilo Fortunado Odaen, 31, minyo, taga Zone-7, Phase 2, Villa Candida Subdivision, Bulua, ning siyudad sa Cagayan de Oro.

Si Inspector Rafael Roxas sa Scene of Crimes Operatives (SOCO) nibutyag sa Sun.Star Superbalita nga sa wala pa nahitabo ang insidente nakadawat og tawag ang biktima gikan sa wala mailang caller kinsa nagpatuong kostumer.

Gibutyag sa maong caller nga magpakuha kini sa Zone-5, Barra, Opol, Misamis Oriental kay magpahatod.

Apan paghidangat ni Odaen sa lugar kalit lang kini gipusil ug gituohang ang nanawag kaniya ang responsabli niini. Maayong pagkaigo sa liog sa biktima hinungdan sa hinanaling kamatayon.

Matud ni Roxas nga walay nakabantay sa hitabo gawas lamang sa

nadungog nga usa ka buto hinungdan nga nagkagubot ang pipila ka mga residente sa dapit.

Dili pa ikabutyag ning panahona ang gigamit sa pagpatay sa biktima apan giingong high powered firearms kini ug nahipos sa crime scene ang usa sa basyo sa bala niini.

Matud sa asawa sa biktima nga walay kaaway ang iyang bana ug dili angayng mahitabo ang ingon hinungdan nga hustisya gyod ang gipangayo.

Nakuha man ang cellphone number sa maong caller apan dihang gitawagan sa mga imbesitgador gikan sa Opol Police Station dili na kini makontak.

Niini, padayon pang gitino sa kapolisan ang motibo sa pagpangluthang ug ang kalambigitan sa maong driver.

Ang patayng lawas gidala ning panahona sa Bollozos funeral parlor.