NAGPAHALWA ka sa bangkilan nga lingla
Mipaundayon ka sa agni ug lamat sa sulad
Nga kanimo mibutad aron makigduyog
Sa iyang bahakhak bisan ikaw nasayod
Nga sa likod sa kaanyag ni Maruja
Adunay ngipon sa kabangis nga nagpahipi.
Mga kidhat sa sugang lain-lain og bulok
Wala makabuntog sa kangiob nga gilumloman
Sa nagsalimuang nga mga hugyaw
Niadtong mga nanagtilagak ang laway
Taliwala sa praning nga tukar ug sa
Naghiyod-hiyod nga linalik.
Ang tanan naulipon sa espirito
Sa ihi sa demonyo kay gimanduan
Sa rabbies sa imong utok.
Gihalad mo ang imong mga singot
Didto sa construction site.
Walay tumong ang imong dagan
Tadlas sa kantalita sa adlaw ug pagyamiid
Sa mga abog bisan naburyong ang
Imong galamhan sa kalibog kon hikit-an
Ang nawalang dagom diha taliwala
Sa mga balod ug mikurog ang imong
Kaunoran sa daw bomba sa imong dalunggan
Ang ngulob sa tigre mong asawa.
Unya natugaw ug nahingangha ang
Tanang mga mata diha sa dalan Colon
Kay sa nagpaas mong tingog misinggit ka
“Venus, maluoy ka, iuli ang akong kuwarta
Aron matambalan ang gi-dengue kong anak!”