GIPANGITA na sa kapulisan sa San Pedro Police Station ang suspek sa pagpanunggab sud sa usa ka balay kalingawan niadtong Miyerkules sa gabii, Nobiyembre 13, sa Davao City.
Alas 8 sa buntag niadtong Huwebes, naila ang suspek pinaagi sa rouge gallery sa San Pedro Police Station gumikan sa testigo sa hitabo didto sa Ironvoyz KTV Bar sa Rizal Street, ning siyudad.
Naila ang suspek nga si Ernesto Nenaria, 21-anyos, residente sa Matina, ning siyudad.
Ang mga biktima mao sila Jason Sta Maria Dizon, 24 anyos, ulitawo, government employee; ug Jay Paclaban Pajaron, 20 anyos, nagtrabaho sa Red Ribbon ug pulos nagpuyo sa Purok 10, Barangay 76-A, Bucana.
Migula sa inisyal nga imbestigasyon nga naaborido ang suspek samtang nagtagay og ilimnong makahubog ug kalit niyang giduol ang lamesa sa mga biktima.
Giingon nga nanghagit og away ang suspek maong mialma ang pipila ka mga guests nga katupad ra sa lamesa ug napahimungtan ang mga biktima dayon gidunggab.
Hinuon, wala masamdan ang mga nahisgutan kinsa nakalikay sa pagpanunggab.
Nagpahimangno ang kapulisan sa mga nanag-iya og bar nga magmontar gayod og guwardiya aron maoy unang makaresponde sa kagubot. (Jeepy P. Compio)