MAGSAYSAY, Davao del Sur -- Giabisohan sa mayor ning lungsod ang mga molupyo nga di magpadala sa hungihong nga gipakatag sa ubang bakwit sa linog nga adunay wakwak sa ilang lugar.
Sumala ni Mayor Arthur Davin nga buot sakyan sa uban ang isyo sa wakwak aron mahadlok na ang mga molupyo ug makapabor ang mga kawatan.
Unang gipabuhagay ni Hans Ditmer Lauda nga gikawras siya og wakwak samtang natulog sa tent kay hadlok sa linog.
“Nakamata ko’g kalit kay gikambras ko. Unya pag gawas nako, nikalit ra’g kawala sa unahan,” asoy niini.
Gidason niini nga usa ka dakong iro nga kolor itom ang maong wakwak.
Ang ubang molupyo sama kang Efren, 42, dili motuo nga aduna’y aswang sa ilang lugar.
Gibarogan sab sa molupyong si Nexor Llerin nga tinuod ang maong wakwak sanglit nibalik kini pagka-Lunes sa gabii ug nahimong usa ka dakong iring mao nga ila dayong gigukod.
Human sa hitabo, miani og kabalaka ang ubang molupyo sanglit sa trapal ug tent sila nagatulog panahon sa kagabhion tungod kay mahadlok nga mobalik ang kusog nga linog.
Hinuon, giawhag sa mayor ang publiko nga gawas sa linog bantayan sab niini ang ilang mga kabtangan. (Orlando B. Dinoy)