KAHIBAW ka ba nga ang atong mga inadlaw-adlaw nga mga ginbuhaton makadaot sab sa panglawas?
Matod ni Stacey Matish sa Home Remedy nga basahon bisag ang mga simple ug ordinaryong tulumanon matag adlaw sama sa pag-toothbrush, pagpanghinlo, ug luto makadaot kung kanunayon.
Pananglitan ang di pagkaon og pamahaw o painit kay wa pa gutma, nagdali o kaha nag diet. Sa tinuoray ang di pagtimo sa buntag mas makatambok kay ma ingganyo naman hinuon og kaon panahon sa ting snacks nga kasagaran tam-is dayon sundan sa bug-at nga pani-udto.
Sunod kining sobra nga paggamit sa cellphone. Ang uban nanga-ungo na ini kay halos di na mabuhi og di makatuplok sa gitakin-takin nga gadget. Kung kini gamiton panahon sa ting katulog, ang asul nga suga ini gikan sa iyang screen maka-pamata ug makapa-abtik sa utok maong makuwangan na hinuon ang oras sa katulog ug kalidad sa pahuway.
Ang sobrang pag-inom og lain-laing klase nga bitamina delikado sab sa sakit-sakit. Seguradoa nga ang gi-inum nga supplement dunay pagtugot sa imong mananambal og nagbasi sa rekomendasyon sa BFAD (Bureau of Food and Drugs).
Ang kanunay pagkaon og snacks bisag wa gutoma, labi na og mga junk foods, kung magtan-aw og TV, makapaburot sa lawas. Posibli sab nga mosaka ang sodium ug cholesterol nga maoy maka-pabara sa atong kaugatan.
Ang subrang pag-toothbrush kada human sa kaon mao say maka-ingon sa pagka-guba sa natural nga enamel sa ngipon ug maka-samad sa lagos labi na kung kusog ug kanunay ang pagkuskos sa ngipon.
Ang kanunay sab nga paglingkod gikan sa trabahoan hangtod na sa balay, subra sa upat ka oras, mas dako og posibilidad nga masakit kay ang lawas wa man maglihok ug kulang sa ehersisyo. Busa paninguhaa nga maka lakaw-lakaw labi na panahon sa break.
Katapusan kining subrang pag inum og tubig. Tinuod 8 ka basong tubig ang dapat nga imnon apan kung masubrahan, posibling maka-palasaw sa sodium(asin) nga naa sa atong dugo. Busa ayaw palabi, inum lang kung uhawon.