NORTH COTABATO -- Wala tuguti ni Mayor Joseph Evangelista ang mga Christmas parties ug staff development activities sa mga opisyal ug empleyado sa city government sa Kidapawan.
Kini human nga nagpagawas si Mayor Evangelista og usa ka Memorandum Order 3717, Series of 2019 nga nagmando sa tanan nga department heads nga kanselahon ang tanan nga aktibidad sa bulan sa Disyembre ilabina ang Christmas party.
Dili gusto sa mayor nga i-sakrispiyo ang kaluwasan sa iyang mga empleyado ilabina nga dunay mga aftershocks pa nga nasinatian gumikan sa tulo ka sunod-sunod nga kusog nga linog.
Nangliki sab ang ubang parte sa city hall hinungdan nga dunay mga buhatan ang gibalhin sa laing pasilidad sa kagamhanan.
Dili angay nga magmaya ang city government ilabina sa dakong problema nga gisagubang niini sa dakong epekto sa linog.
Gisugyot na lamang ni Evangelista nga kadtong pondo nga gamiton sa mga empleyado itabang na lamang sa mga pamilya nga nawad-an og balay tungod sa linog.
Gihangyo na lamang sa mayor ang iyang mga empleyado nga magsilibrar na lamang og Pasko lakip na Bag-ong Tuig uban ang ilang mga mahal nga pamilya. (Edgar Fuerzas)