Benepisyo alang sa ‘solo parent’ gihangop

NAGHI-usa ang mga opisyales sa solo parent organizations sa upat ka mga rehiyon aron suportahan ang balaudnon nga naghatag og dugang benepisyo alang sa tres milyones nga mga solo parent sa tibuok nasud.

Ang Department of Social Welfare and Development nitapok sa mga opisyal sa solo parent organization gikan sa Region 5, 6, 7, 8 alang sa duha ka adlaw nga national ug regional consultation sa mga solo parent didto sa Elizabeth Hotel nga nagsugod kagahapon.

Si Daisy Lor, ang Focal Person of the Family ug head sa Crisis Intervention Section sa DSWD 7 nagkanayon nga kini ang pagpakita og suporta sa Senate Bill No. 1936 kon an Act Providing for Benefits and Privileges to Solo Parent and Their Children nga giduso ni Senator Risa Hontiveros diin niabot og 103 ka officers gikan sa maong mga rehiyon.

Gipadayag ni Lor nga ang Republic Act 8972 kasagaran sa mga nakabenepisyo niini kadto rang mga solo parent nga adunay trabaho. sanglit sila ang makabenepisyo sa parental leave ug flexible work schedule nga maoy labing dagko nga benepisyo nga nalatid sa maong balaod.

Apan sa SB ni Hontiveros nga ilang gisuportahan, nalakip na niini ang mga provision nga bisan kadtong mga solo parent nga way trabaho makabenepisyo sab.

Kon ma-aprobahan ang balaodnon ni Hontiveros, ang mga solo parent kinsa adunay identification card gikan sa DSWD makabenepisyo sa 20 percent discount sa medisina, bakuna ug ubang medical supplements, supplies, accessories ug mga equipment para sa mga bata kinsa nag-edad og 18 anyos paubos.

Apil usab niini ang 20 percent discount sa tanang basic necessities sa bata, 20 percent nga discount sa tuition fees sa private ug public school kada bata gikan sa kindergarten paingon sa college level way labot sa mga scholarship grants.

Taga-an usab og 20 percent discount sa hospital bills sa private ug public hospitals uban sa mga laboratory fees ug laing 20 porsiyento sa private ug public recreational facilities.

Gipasabot ni Lor nga sa amendatory SB ni Hontiveros, ang tanan makabenepisyo dili lang ang kadtong naay trabaho kon dili apil na usab kadtong anaa lang sa ilang mga balay.

Ang solo parent subay sa maong balaod mao kadtong babaye o lalaki nga maoy nagbuhi sa ilang mga anak, namatyan og bana o asawa, kadtong napriso ang ilang pares gumikan sa pagka-priso lapas na sa usa ka tuig, kadtong nagbuwag pinaagi sa annulment o legal separation, kadtong wala makasal apan maoy nabuhi sa ilang anak ug kadtong tawo nga maoy nagbuhi sa bata ug uban pa.

Base sa record sa Philippine Statistics Authority, adunay 1 milyon ka mga solo parent nga lalaki ug 2 milyones nga solo parent nga babaye. (PAC)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph