WALA mahinayon sa iya untang paglarga ang usa ka abogado paingon sa kaulohan human nakuhaan kini og pinaugang marijuana sa Mactan Cebu International Airport (MCIA), pasado alas 10:00 sa buntag kagahapon, Biyernes, Nob. 15.
Ang nadakpan mao si Atty Caesar Antonio Tabotabo, 55, taga dan Jones, dakbayan sa Sugbo kinsa nakuhaan og marijuana sa gikumot nga kaha sa sigarilyo.
Nasakpan si Tabotabo sa iyang gidalang kontrabando human nga na-detect kini sa initial screening checkpoint sa Terminal 1 sa MCIA.
Giingong mitingog ang body scanner sa entrada sa departure area dihang mosulod na unta si Tabotabo alang sa iyang flight sa kaulohan.
Dinhi na giingong gisusi ang sulod sa bulsa ni Tabotabo apan giingong gigunitan niini sa iyang kamot ang kaha sa sigarilyo nga maoy gisudlan sa pinaugang marijuana.
Hinungdan nga gipangutana na usab siya sa mga security personnel unsa iyang gigunitan sa kamot.
Inay motubag gibutang na lang niini ang iyang gigunitan sa lamesa sa may entrada sa departure area.
Dinhi na gihiling kini sa mga security personnel ug nakita nga adunay sulod nga gituohang pinaugang marijuana ang dala niining kaha sa sigarilyo.
Daling nanawag ang Office for Transport Security OTS sa mga sakop sa Philippine Drug Enforcment Agaency PDEA-7 aron maproseso ang abogado.
Si Tabotabo nagdumili na pagluwat og pamahayag sa mga sakop sa tigbalita dihang gisuwayan kini og kuha sa iyang habig mahitungod sa pasangil batok kaniya. (GCM)