Pasidaan: trapik sa SRP karong hapon

NILUWAT og pasidaan ang kagamhanan sa dakbayan sa Sugbo ug Talisay bahin sa masinati nga kahuot sa trapiko sa Cebu South Coastal Road (CSCR) sa South Properties karong hapon, Nobiyembre 16.

Ang Cebu City Transportation Office (CCTO) mosira sa tibuok karsada gikan sa SM Seaside City paingon sa taytayan nga utlanan sa Talisay sugod alas 3:00 sa hapon hangtod mahuman ang 30th SEA Games Torch Run nga kalihokan sa SRP.

Si Andres Bayarcal, operation head sa CCTO, nagkanayon nga abli ang mga lanes sa CSCR gikan sa Talisay apan himuon kining two-way traffic hangtod sa unahan sa taytayan.

Ang mga sakyanan nga mopaingon sa Talisay City nga moagi sa SRP nga gikan sa Plaza Independencia ug Barangay Mambaling makaagi lang gihapon sanglit ablihan sa CCTO ang intersection para sa maong adlaw para maoy agian sa mga sakyanan.

Sa maong paagi, padayon gihapon nga makalagbas ang mga sakyanan bisan pa man sa Torch Run.

Giawhag ni Bayarcal ang mga motorista nga kon mahimo adto lang sila moagi sa dalan N. Bacalso para dili sila maghuot sa South Coastal Road.

Ang CCTO temporaryo usab nga nidili sa pag U-turn sa mga sakyanan ilawom sa tulay sa boundary sa Cebu City ug Talisay City atol sa maong mga oras.

Matod ni Bayarcal nga kon mahuman ang kalihukan nga wala pay alas 6:00 sa gabii, ablihan dayon og balik sa mga motorista.

Ang 30th SEA Games gikatakdang saksihan ni Mayor Edgardo Labella kinsa moapil sa dagan, Secretary Michael Dino, Senator Bong Go ug mga opisyal sa dakbayan sa Sugbo ug kasikbit nga mga local government unit.

Samtang, ang City of Talisay Traffic Operations Development Authority (CT-TODA) nipahimangno nga angay planuhon ang mga lakaw karon.

Matod ni Jonathan Tumulak, CT-TODA head, nga mas maayong mosayo sa paglakaw ug dili na magpaabot pa nga maabtan og alas 12:00 sa udto.

“Mopakatap ta sa maong dapit sa atong mga traffic enforcer, kay maapektuhan man gyud ta. Sa Cebu City nga habig ang sirad-an, apan konektado man ta. So ato awhag nga planuhon daan ang ilang byahe aron dili matanggong,” matod ni Tumulak. (PAC, FMD)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph