Anting-anting sa suspek

HABAK: Usa ka itom nga panapton (ubos) maoy habak sa suspek sa pagpayuhot og gidiling druga nga si Francisco Leñejan (tuo), 29, ug taga Tangil, lungsod sa Dumanjug. Dihang giablihan kini (taas), nakita ang bukog sa tuwaytuway o tuhod sa tawo. (Benjie T. Talisic, Kapulisan sa Dumanjug)
HABAK: Usa ka itom nga panapton (ubos) maoy habak sa suspek sa pagpayuhot og gidiling druga nga si Francisco Leñejan (tuo), 29, ug taga Tangil, lungsod sa Dumanjug. Dihang giablihan kini (taas), nakita ang bukog sa tuwaytuway o tuhod sa tawo. (Benjie T. Talisic, Kapulisan sa Dumanjug)

LIMA ka sakop sa Drug Enforcement Unit (DEU) sa lungsod sa Dumanjug, Cebu nangalabay ug wala makapiug sa kusgan nga suspek sa pagpayuhot og gidiling druga nga ilang dakpon niadtong Lunes, pasado alas 2:00 sa hapon, Nobiyembre 11, 2019 .

Si P/Capt.Ardioleto Cabagnot, hepe sa Dumajug Police Station, nisaysay sa Superbalita Cebu sa talagsaong panghitabo sa buy bust sa Barangay Tangil.

Giila ni Cabagnot ang ilang target sa ronda mao si Francisco Leñejan, 29, molupyo sa Barangay Tangil.

Matod ni Cabagnot, nalakip sa listahan sa drug watchlist si Leñejan nga usa sa mga gireklamo sa barangay nga wala pa gihapon moundang sa pagpamaligya og ilegal nga drugas.

Dugang ni Cabagnot, dihang napalitan na si Leñejan sa usa sa iyang mga sakop nga maoy poseur buyer, giingong nakabantay si Leñejan nga dunay laing niabot nga upat ka mga lalaki.

Nasuta ni Leñejan nga mga pulis na diay ang iyang giatubang.

“Pagdakop ani among target nanglagpot ako mga sakop kay nisukol man. Nagkapanguspangus gyud intawon gani nangilid,” matod sa hepe.

Asoy sa kapulisan nga sama sa gamhanan si Leñejan niadtong tungura.

”Kusgan daw kaayo bisan unsaon nimo og dumog dili daw nila madaug,” dason niya.

Nangapildi ang lima ka mga operatiba nga maskulado dihang gipahagba sa usa lang ka tawo.

“Daw dunay lain namatikdan ang akong sakop kay duna daw mga gipamong ang suspek nga pulong Latin, dili masabtan. Katingalahan kaayo ang iyang kakusgon. Kay sila gyud tanan galisod, taman nilang hawid para pusasan,” matod ni Cabagnot.

Gani nanukmag pa kini sa mga pulis nga nironda kaniya. Apan sa katapusan, naposasan si Leñejan ug ilang dinakpan.

Dihang naposasan na, nabantayan sa mga operatiba nga dunay nagbukol sa hawakan ni Leñejan.

Pagsusi na niini sa pagtuo nga armas, usa ka medyas nga itom ang ilang nakita.

Ang sulod sa medyas nga itom usa ka tuwaytuway kon sa katigulangan gikan sa bukog sa taw, ang ilang nakita.

Gipabutang ni Cabagnot didto sa dakong krus sa usa sa mga sam-ang sa Dumanjug.

Si Leñejan nasakmitan og shabu nga balor og kapin P1,000 subay sa iyang Dangerous Drugs Bureau (DDB) value.

Gawas sa kasong kalapasan sa pagpamaligya ug paghupot sa ilegal nga drugas, Kalapasan sa Republic Act 9165 kabahin sa Dangerous Drug Act sa 2002.

Mag-atubang usab si Leñejan og kaso nga direct assault human nga ang lima ka mga pulis mopasaka og kaso kaniya human sa iyang gihimo atol sa pagronda.

Ang mga nahisgutang kaso napasaka na sa suspek sa korte ug gipaabot nalang ang iyang papeles aron mahatod na sa BJMP.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph