DIGOS CITY -- Sanglit nagkaduol na ang adlaw sa Pasko mao nga pormal ng giablihan sa Davao del Sur Electric Cooperative (Dasureco) ang ilang Christmas Bazaar isip kabahin sa “Paskuhan sa Dasureco 2019”, alas 6:30 sa gabii, Biyernes, Nobyembre 15.
Mitambong sab sa okasyon sila si National Electrification Administration (NEA) Administrator Edgar Rama Masongsong ug Recoboda Party-list Representative engineer Godofredo Guya.
Gibutyag ni Dasureco officer-in-charge Danny Canastra nga matag Biyernes lang sa gabii ablihan sa publiko ang Christmas Bazaar hangtud sa Disyembre 20.
Mahimong makasuroy-suroy sa sud ang matag indibidwal gikan alas 7-10 sa gabii ug aduna’y entrance fee nga P10.
Apan, ang mga bata nga nag-edad og 12-anyos paubos libre nga makasud sa bazaar.
Gawas sa makalingaw nga mga dagitabnong suga sa Pasko diin patok alang sa mga mahiligon sa selfie, aduna sab mga pagkaon nga baligya sa sud.
Gipaabot sa mga kawani ug mga nagduma sa Dasureco ang ilang pagtimbaya ug pag-awhag sa mga konsumante nga himoong malinawon ug malipayon ang pagsaulog sa Pasko.
Nagpahinumdom sab si Canastra sa publiko nga seguruong dili peke ang mga dekorasyong Christmas lights aron luwas sa sunog. (Orlando B. Dinoy)