KIDAPAWAN CITY -- Tungod sa kapobre nanawagan ang usa ka lumad og tabang nga malubong ang iyang amahan nga nakabsan sa iyang kinabuhi sa evacuation center sa siyudad sa Kidapawan.
Giila ang namatay nga si Modesto Bayawan Sr., mag-uuma ug nagpuyo sa Sitio Sayaban, Barangay Ilomavis, Kidapawan City.
Matud sa anak ni Modesto nga si Modesto Bayawan Jr. nga may sakit nga asthma ang iyang amahan.
Sa diha nga mihikling sila ug temporaryo nga nagpuyo sa evacuation center sa sentro nga bahin sa Barangay Ilomavis, misamot ang sakit sa iyang amahan gumikan sa sobra katugnaw ug nakabsan sa kinabuhi.
Nanawagan si Modesto Jr. sa gobyerno ug sa LGU-Kidapawan nga sila matabangan nga malubong ang iyang amahan.
Nawad-an og panginabuhian ang pamilya Bayawan sa diha nga gitay-og sa makusog nga linog ang probinsiya sa Cotabato.
Kahinumduman nga nagpatuman og forced evacuation si Mayor Joseph Evangelista gumikan sa landslide ug dagkong liki sa yuta sa Barangay Ilomavis ug dili na puwede nga puy-an.
Nangaguba sab ang kabalayan sa Barangay Ilomavis hinungdan nga wala nay mabalikan ang mga molupyo.
Hinuon nagpasalig na si Mayor Evangelista nga matabangan ang pamilya ni Bayawan nga malubong ang iyang amahan. (Edgar Fuerzas)