TACURONG CITY -- Nadepyos ug narekober sa militar ang usa ka bomba ug mga tag-as nga matang sa armas alas 10:40 sa buntag niadtong adlaw nga Biyernes sa probinsiya sa Sultan Kudarat.
Sa taho gikan sa 601st Brigade ng 6th Infantry (Kampilan) Division Philippine Army nga nakadawat og impormasyon ang mga sakop sa 40th Infantry Battalion gikan sa mga sibilyan sa bomba nga gibilin daplin sa kalsada sa Brgy. Bagumbayan President Quirino, Sultan Kudarat.
Abtik nga nagresponde ang puwersa sa 40th IB uban ang kapulisan ug mga sakop sa Explosive Ordnance Disposal Team sa Phil. Army ug ilang gidepyos ang bomba.
Pipila lamang ka metros ang gilay-on sa bomba nga nadepyos nadiskubre sab sa mga sundalo ug pulis ang mga tag-as nga matang sa armas.
Ang mga armas gilangkuban sa sa usa ka M79 grenade launcher, usa ka Caliber .22 hunting rifle, usa ka kalibre .45 nga pistola ug mga bala.
Grupo sa mga terorista nga Bangsamoro Islamic Freedom Fighters (BIFF) ang gitudlo nga nagbilin sa mga armas og bomba.
Sa pagkakaron gipalig-on pa sa mga sundalo ug pulis ang seguridad sa President Quirino, batok sa dautang hulga sa mga armadong grupo. (Edgar E. Fuerzas)