GIARESTO sa otoridad ang usa ka 57-anyos nga Italyanong lalaki human madiskubre ang mga child sexual abuse and exploitation materials sa iyang electronic devices atol sa search warrant implementation, ala una sa hapon, Miyerkules, Nobyembre 13, 2019.
Miyembro sa Women and Children Protection Center – Mindanao Field Unit (MFU) sa pagpanguna ni Police Captain Princess Obrique-Bergado, ilawom sa superbisyon ni Police Lieutenant Colonel Christine Tan, nanguna sa pagtunol sa warrant to search, pagkumpiska ug pag-eksamin sa computer data nga giisyu ni Cybercrime Court Judge Retrina Espe Fuentes kontra Lorenzo Marchesi.
Ang pagrekisia nahitabo sa holding facility sa Bureau of Immigration (BI) office sa Davao City, diin si Marchesi nakadetiner sukad Nobyembre 8, 2019 human siya masignit sa Davao International Airport subay sa mission order sa iyang pagka-aresto nga giisyu ni BI Commissioner Jaime Morente.
Ang suspek gikonsidera nga “undesirable alien” subay sa daghang reklamo nga gipasang-at kontra niya, sama giingong paglapas sa Expanded Anti-Trafficking Act, Anti-Cybercrime Prevention Act, ug Anti-Child Abuse Act.
Subay sa database sa BI, si Marchesi gawas ug sulod lang sa nasud sukad Enero ning tuig, pinaagi sa international airports sa Davao ug Mactan, Cebu.
Misuporta sa pagpatuman sa search warrant mao ang Regional Anti-Cybercrime Unit (RACU) 11 Inter-agency Council Against Trafficking (Iacat) – Anti-Trafficking in Persons Task Force (RATTF)-Davao Region, Iacat-RATTF-Caraga Region, Police Station 1 sa Sta. Ana Police Station (Davao City), Bislig Municipal Police Station (Surigao del Sur), BI Davao City, ug non-government organizations International Justice Mission (IJM), Justice, Peace and Integrity of Creation–Integrated Development Center, Inc. (JPIC-IDC).
“The Philippine National Police, immigration officials, prosecutors and partners from non-government organizations are making an all-out effort to apprehend those who abuse and exploit our children online. We are doing our best for our precious children to have a safer place to live, for them to enjoy their childhood,” suma ni Police Captain Princess Obrique-Bergado.
Si Deputy Regional Prosecutor Barbara Mae Pagdilao-Flores, chief of operations sa DOJ-IACAT-RATTF sa Davao Region, nalipay sab sa pagka-aresto sa langyaw, “Last Wednesday’s arrest of an Italian child sex offender shows yet again how the online sexual exploitation of children (Osec) is also fueled by demand from perpetrators living in Western countries. We hope that this would push countries from the demand side to impose stiffer penalties against their citizens who pay for and direct the horrible abuse of children.”
Niya, ang DOJ Inter-Agency Council Against Trafficking - Regional Anti-Trafficking in Persons Task Force 11 padayon nga nakigkoordinar sa local ug international law enforcement agencies, uban ang laing government stakeholders, aron paggukod sa mga online child sex offenders. (SunStar Philippines/International Justice Movement)